*प्रेमात नाहलो मी ….*

प्रेमात नाहलो मी पुरता पहा बुडालो
मी फुलपांखरू ग फुलांसवे उडालो
मधुगंध हा तुझा मी श्वासात घे भरूनी
गजरा पहा तुझा हा घमघमतो दुरूनी.

मी प्रेमवेडा वीर पापणी तुझ्या रहातो
अन् आसवांसवे ग मी वाहूनीही जातो
तू रातराणी धुंद वाऱ्यासवे डुलावी
चाफ्यात ग पहा ती मम पापणी अडावी

तू चंद्र सूर्य माझा शुक्राची चांदणी तू
नवलक्ष चांदण्यात तू दिसते ग उठूनी
नयनात तूच राधा मज होई प्रेम बाधा
हृदयात स्पंदने तू मी आहे साधासुधा

ओठांवरी तुझे ग मम गीत मीच गातो
मी निशीदिनी तुला ग ओठात आळवितो
तू विश्व आहे माझे तू आहे माझा देव
कुपीत अत्तराच्या अनमोल अशी ठेव

सांधून विश्व माझे तू फूल उंबराचे
मम भाग्य थोर आहे उपकार ग तयाचे
प्रेमात नाहलो मी पुरता पहा बुडालो
मी फुलपांखरू ग फुलांसवे उडालो

प्रा.सौ. सुमती पवार ,नाशिक
(९७६३६०५६४२)