*केंद्र तसेच राज्यातील सत्ताधारी जनतेला एकाही बाबतीत दिलासा देऊ न शकल्यानेच जिल्ह्याला पुन्हा एकदा दहशतवाद व राडेबाजीकडे घेऊन जात आहेत..!*

*शांतताप्रिय सिंधुदुर्ग मध्ये राडेबाजी करणाऱ्यांना आता जनतेनेच धडा शिकवण्याची गरज…मनसेची टीका*

कुडाळ :

एकीकडे देशात महागाईचा वाढलेला उच्चांक,दैनंदिन वाढणारी पेट्रोल- डिझेल दरवाढ ,महागलेला घरगुती गॅस  या सर्वच बाबतीत सर्वसामान्य जनता होरपळत असून जगण्यासाठी संघर्ष करत आहे. मात्र केंद्रासह राज्यातील सत्ताधारी जिल्ह्यात पुन्हा एकदा राडेबाजी व दहशतवादी वातावरण निर्माण करून मूळ प्रश्नांपासून जनतेचे लक्ष विचलित करण्याचा प्रयत्न करत आहेत हे दुर्दैवी आहे. मुळात 35 रुपयांना मिळणारे पेट्रोल केंद्रासह राज्य 100 रुपयांना विकुन जनतेची लुबाडणूक करत आहे यावर शिवसेना-भाजप बोलायला तयार नाहीत ही खरी शोकांतिका आहे. कुडाळ पेट्रोल पंप परिसरात सेना भाजपचे कार्यकर्ते एकाच वेळी एकत्र येतात, राजकीय हमरीतुमरीतुन राडा होतो हा सर्व पूर्वनियोजित कट होता असा मनसेचा थेट आरोप आहे.सोशल मीडिया च्या माध्यमातून काल याबाबतीत संदेश पसरत असताना प्रशासनाने फक्त बघ्याची भूमिका घेतल्यानेच पुढील राजकीय वादंग उठला ही खरी वस्तुस्थिती आहे. गगनाला भिडलेली महागाई,पेट्रोल डिझेल दर,घरगुती गॅस  किंमती कमी करून जनतेला दिलासा द्यावा; हे या राजकीय पक्षांकडून खऱ्या अर्थाने अभिप्रेत असताना प्रत्यक्षात राजकीय कुरघोडी करून जिल्ह्यात “राजकीय धुळवड” साजरी करून जनतेची जणू थट्टाच करत आहेत असे भासते.एकीकडे जिल्हा कोरोना महामारीशी झुंजत असताना,कोविड मृत्यूमुळे दरदिवशी सरासरी 10 ते 12 संसार उघडयावर येत असताना शिवसेना-भाजप मात्र राडेबाजीत मग्न आहेत हे जिल्ह्याला भूषणावह नसून आता जिल्ह्यातील जनतेनेच यांना धडा शिकवण्याची खरी गरज असल्याची टीका मनसेचे कुडाळ तालुकाध्यक्ष प्रसाद गावडे यांनी प्रसिद्धीपत्रकाद्वारे केली आहे.