आमदार दीपक केसरकर यांचे दोन दिवसांत आराखडा वरिष्ठ स्तरावर सादर करण्याचे निर्देश; ट्रिगर-१ दुष्काळाच्या पार्श्वभूमीवर आढावा बैठक
वेंगुर्ला : सन २०२६-२७ मधील संभाव्य पाणीटंचाईच्या पार्श्वभूमीवर वेंगुर्ला तालुक्यातील १२९ वाड्यांसाठी ३ कोटी ६६ लाख रुपयांचा पाणीटंचाई कृती आराखडा तयार करण्यात आला आहे. या आराखड्यातील कामांना गती देऊन तो दोन दिवसांत वरिष्ठ स्तरावर सादर करण्याचे निर्देश माजी मंत्री तथा आमदार दीपक केसरकर यांनी संबंधित विभागाच्या अधिकाऱ्यांना दिले.
सन २०२६-२७ मधील पाणीटंचाई कृती आराखडा आणि ट्रिगर-१ दुष्काळाबाबत आढावा बैठक सोमवार, १९ ऑक्टोबर रोजी सायंकाळी वेंगुर्ला नगरपरिषदेच्या स्वामी विवेकानंद सभागृहात आमदार दीपक केसरकर यांच्या अध्यक्षतेखाली पार पडली. यावेळी ग्रामीण पाणीपुरवठा विभागाच्या वतीने वेंगुर्ला तालुक्यातील १२९ वाड्यांसाठी ३ कोटी ६६ लाख रुपयांचा पाणीटंचाई कृती आराखडा सादर करण्यात आला.
या आराखड्यात विविध पाणीपुरवठा विषयक कामांचा समावेश असून, आवश्यकतेनुसार त्यामध्ये वाढ करण्यात येणार आहे. पाणीटंचाईच्या संभाव्य परिस्थितीचा विचार करून आराखड्यातील कामे तातडीने पूर्ण करण्याच्या दृष्टीने नियोजन करण्याचे निर्देश आमदार केसरकर यांनी दिले. तसेच, दोन दिवसांत हा आराखडा वरिष्ठ स्तरावर सादर करण्याचे आदेश त्यांनी संबंधित अधिकाऱ्यांना दिले.
या बैठकीला प्रांताधिकारी वीरसिंग वसावे, वेंगुर्ला तहसीलदार ओंकार ओतारी, जिल्हा परिषद शिक्षण व आरोग्य सभापती प्रितेश राऊळ, पंचायत समिती सभापती शंकर घारे, उपसभापती सचिन देसाई, नगराध्यक्ष दिलीप गिरप, उपनगराध्यक्ष सुहास गवंडळकर, गटविकास अधिकारी वासुदेव नाईक, ग्रामीण पाणीपुरवठा उपअभियंता प्रफुल्लकुमार शिंदे, जिल्हा परिषद सदस्य सुजाता पडवळ, संजय गावडे तसेच पंचायत समिती सदस्य उपस्थित होते.
वेंगुर्ला तालुक्यात ट्रिगर-१ दुष्काळ जाहीर करण्यात आला आहे. त्यामुळे आगामी काळात पाणीटंचाईची शक्यता लक्षात घेऊन सर्व संबंधित विभागांनी समन्वयाने आणि तत्परतेने काम करावे, असे निर्देशही आमदार दीपक केसरकर यांनी यावेळी दिले. संभाव्य पाणीटंचाईवर मात करण्यासाठी आवश्यक उपाययोजनांची प्रभावी अंमलबजावणी करण्यावर बैठकीत भर देण्यात आला.
