फोंडाघाटमध्ये वळवाच्या पावसाच्या सरी; मान्सूनपूर्व तयारीला वेग

मृग नक्षत्राच्या पार्श्वभूमीवर शेतकऱ्यांची लगबग; अपूर्ण पुलांची कामे तातडीने पूर्ण करण्याची मागणी

फोंडाघाट

फोंडाघाट परिसरात आज सकाळपासून वळवाच्या पावसाच्या सरी कोसळत असून वातावरणात गारवा निर्माण झाला आहे. मान्सून आगमनाची चाहूल लागल्याने संपूर्ण परिसरात पावसाळी वातावरण अनुभवायला मिळत आहे.

शेतकऱ्यांची पेरणीपूर्व तयारी सुरू

मान्सून जवळ आल्याने शेतकरी वर्गाची पेरणीपूर्व तयारी सुरू झाली आहे. बियाणे, नांगर, बैल तसेच शेतीसाठी लागणाऱ्या विविध साहित्यांची जुळवाजुळव करण्यात शेतकरी व्यस्त आहेत. यंदाच्या हंगामासाठी शेतकरी आशावादी असून चांगल्या पावसाची अपेक्षा व्यक्त केली जात आहे.

बाजारपेठेत छत्री आणि रेनकोट खरेदीची लगबग

पावसाच्या सरी सुरू होताच बाजारपेठेतही चैतन्य निर्माण झाले आहे. शालेय विद्यार्थ्यांसह नागरिकांकडून छत्री, रेनकोट आणि अन्य पावसाळी साहित्य खरेदीसाठी गर्दी वाढू लागली आहे.

अपूर्ण पुलांमुळे नागरिकांमध्ये चिंता

फोंडाघाटमधील दोन पुलांची कामे अद्याप अपूर्ण असल्याने नागरिकांमध्ये चिंता व्यक्त होत आहे. येत्या ७ जूनपासून मृग नक्षत्रास प्रारंभ होत असून त्यानंतर जोरदार पावसाची शक्यता वर्तविली जात आहे. अशा परिस्थितीत पुलांची कामे वेळेत पूर्ण न झाल्यास बाजारपेठ आणि परिसरातील वाहतुकीवर परिणाम होण्याची भीती व्यक्त केली जात आहे.

पुलांची कामे तातडीने पूर्ण करण्याची मागणी

या पार्श्वभूमीवर ग्रामपंचायतीने या प्रश्नाकडे गांभीर्याने लक्ष देऊन अपूर्ण पुलांची कामे तातडीने पूर्ण करावीत, अशी मागणी सामाजिक कार्यकर्ते अजित नाडकर्णी यांनी केली आहे. याबाबत ते सरपंचांकडे निवेदन देणार असून दोन्ही पुल वाहतुकीसाठी लवकरात लवकर खुले करण्याची मागणी करणार असल्याचे त्यांनी सांगितले.