*ज्येष्ठ लेखिका कवयित्री कला शिक्षिका स्वप्नगंधा सतीश आंबेतकर लिखित अप्रतिम काव्यरचना*

*💐माहेरची मधुवेल💐*

कौलारु छप्पराचा घेत आसरा

मधुवेल चढे वेगे आम्रवृक्षावरी

आठवणी दाटूनी येती हृदयी

पुन्हापुन्हा बोलावे मायेच्या घरी.

/1/

सुंदर हिरव्यापर्णावर झुलती त्याचे

गडद गुलाबी रंगछटाचे पुष़्पझुले

श्वेत, गर्द, फिके, मध्यम, गुलबट

कळ्याफुलांच्या संभाराने वेल झुले.

/2/

लतावृक्षाच्या पर्णसंभारातून दिसे

इवलेसे नीलाकाशरुपाचे कवडसे

बहरली मधुमालती सुगंधात न्हाई

आम्रवृक्षही नजाकतीने उभा असे़.

/3/

वसंतातले चैत्रांगण हे मनोहारी

आनंदे किलबिलणारा विहंग रव

कुहुकुहू मधुरालापे कोकिळतान

मन्मनी स्मृती, हसरा वसंतोत्सव.

/4/

💐🌳💐🌳💐🌳💐🌳💐

स्वप्नगंधा सतीश आंबेतकर

कलाशिक्षिका.