ज्येष्ठ नागरिक सेवा संघ आचरे पंचक्रोशी (फेस्काॅन संलग्न) यांचा जीवनगौरव पुरस्कार २०२६ प्रकाश किरात पेडणेकर यांना जाहीर

आचरा –

ज्येष्ठ नागरिक सेवा संघ आचरे (फेस्कॉन संलग्न) यांचा जीवनगौरव पुरस्कार २०२६ ज्ञानदीप विद्यामंदिर वायंगणी या प्रशालेचे माजी मुख्याध्यापक आणि ज्ञानदीप वाचनालय वायंगणी (मालवण) यांचे विद्यमान अध्यक्ष प्रकाश किरात पेडणेकर मु.पो. वायंगणी, तालुका -मालवण, जिल्हा- सिंधुदुर्ग यांना जाहीर झाला असून त्याचे वितरण मंगळवार दिनांक ३१ मार्च २०२६ रोजी ऐश्वर्य रिसाॅर्ट पिरावाडी आचरे या ठिकाणी संघाचे अध्यक्ष अशोक कांबळी यांच्या शुभहस्ते होणार आहे. शाल, श्रीफळ, पुष्पगुच्छ, सन्मानपत्र व सन्मानचिन्ह असे या पुरस्काराचे स्वरूप असून प्रतिवर्षी ज्येष्ठ नागरिक सेवा संघाच्या मेळाव्यात या पुरस्काराचे वितरण केले जाते अशी माहिती जकारिएस फर्नांडिस – कार्यवाह ज्येष्ठ नागरिक सेवा संघ आचरे यांनी आमच्या प्रतिनिधीला दिली.

या मेळाव्यात मा. सोमनाथ कदम – प्राध्यापक कणकवली यांचे ज्येष्ठांसाठी मार्गदर्शन होणार असून त्यावेळी जेष्ठ नागरिकांचे योगप्रदर्शनाही होणार आहे. त्याचवेळी ज्येष्ठ नागरिक महिला विभागाचा ‘आमच्या वेळच्या कविता’ हा कार्यक्रम सादर होणार आहे.

दरवर्षी जेष्ठ नागरिक सेवा संघाच्या मेळाव्यात आचरे पंचक्रोशीतील विविध कार्यात तन -मन-धन अर्पण करून जे कार्य करतात त्यांना जीवनगौरव पुरस्कार प्रदान केला जातो. प्रकाश किरात पेडणेकर यांनी शैक्षणिक, सामाजिक क्षेत्रात आचरे पंचक्रोशीत गेले अर्धशतक बहुमोल सेवा केलेली आहे आणि शैक्षणिक संस्थांना, अनेक गरजू विद्यार्थ्यांना आर्थिक मदत करणे हे आपले व्रत समजून समाजसेवा केली आहे .या सर्वांचा विचार करून त्यांना यावर्षीचा जीवनगौरव पुरस्कार प्रदान करण्यात येणार आहे.

प्रकाश किरात पेडणेकर हे ज्येष्ठ नागरिक सेवा संघ आचरेचे आजीव व क्रियाशील सदस्य असून ते को.म.सा.प .शाखा मालवण, अ.भा. साने गुरुजी कथामाला शाखा मालवणचे आजीव सदस्य आहेत. त्यांचा विद्यार्थीवर्ग कोकण व मुंबई विभागात पसरलेला आहे. या पुरस्कारासाठी त्यांचे सर्व थरातून अभिनंदन होत आहे.