सिंधुदुर्ग जिल्ह्याचा अभिमान : डॉ. मोहन दहिकर यांना राष्ट्रपती पदक जाहीर

सिंधुदुर्ग

सन 2002 मध्ये उपअधीक्षक म्हणून महाराष्ट्र पोलीस दलात रुजू झालेले डॉ. मोहन दहिकर यांनी आपल्या दीर्घ, निष्ठावान आणि कर्तृत्ववान सेवेमुळे पोलीस दलात वेगळी ओळख निर्माण केली आहे. त्यांच्या उत्कृष्ट व प्रशंसनीय सेवेसाठी भारत सरकारकडून राष्ट्रपती पदक (Medal for Meritorious Service) जाहीर झाल्याने सिंधुदुर्ग जिल्ह्यासह संपूर्ण राज्यातून त्यांच्यावर अभिनंदनाचा वर्षाव होत आहे.

सेवेच्या प्रारंभी वरोरा व नागपूर (ग्रामीण) उपविभागात उपविभागीय पोलीस अधिकारी म्हणून काम करताना त्यांनी शिस्त, पारदर्शकता आणि प्रभावी पोलीसिंगचा ठसा उमटवला. अतिरिक्त पोलीस अधीक्षक पदावर जालना येथील पोलीस प्रशिक्षण केंद्राचे प्राचार्य म्हणून कार्यरत असताना त्यांच्या कुशल नेतृत्वामुळे व सक्षम प्रशासनामुळे या केंद्राला आयएसओ प्रमाणपत्र प्राप्त झाले, ही त्यांच्या कार्यक्षमतेची ठळक पावती ठरली.

मुंबई पोलीस आयुक्तालयात पोलीस उपायुक्त (वाहतूक), झोन 10 व झोन 11 येथे कार्यरत असताना त्यांनी गुन्हे अन्वेषण, अंडरवर्ल्डमधील फरारी आरोपींचे प्रत्यार्पण, कायदा व सुव्यवस्था तसेच व्हीआयपी दौऱ्यांचे नियोजन यासारख्या अत्यंत महत्त्वाच्या जबाबदाऱ्या यशस्वीरीत्या पार पाडल्या. मुंबई एटीएसमध्ये पोलीस उपायुक्त म्हणून त्यांनी अनेक दहशतवादी गटांचा पर्दाफाश करून राष्ट्रीय सुरक्षेला भक्कम बळ दिले.

जातीयदृष्ट्या संवेदनशील असलेल्या भिवंडी शहरात पोलीस उपायुक्त म्हणून कार्यरत असताना सूक्ष्म नियोजन आणि काटेकोर अंमलबजावणीच्या जोरावर धार्मिक सण तसेच 2024 च्या विधानसभा निवडणुका शांततेत पार पाडून त्यांनी आपली नेतृत्वक्षमता पुन्हा एकदा सिद्ध केली.

लोकांसाठी सहज उपलब्धता, ठाम निर्णयक्षमता आणि सखोल कायदेशीर जाण ही त्यांची ओळख ठरली आहे. त्यांच्या या सेवाभावी वाटचालीची दखल घेत 2019 मध्ये पोलीस महासंचालकांचे सन्मानचिन्ह त्यांना प्रदान करण्यात आले होते.
आता भारत सरकारकडून जाहीर झालेल्या राष्ट्रपती पदकामुळे डॉ. मोहन दहिकर यांच्या कर्तृत्वावर अधिकृत शिक्कामोर्तब झाले असून, हा सिंधुदुर्ग जिल्ह्यासाठी अभिमानास्पद क्षण ठरला आहे.
सेवेप्रती त्यांच्या अतुलनीय समर्पणाबद्दल पोलीस अधीक्षक डॉ. मोहन दहिकर सर यांचे हार्दिक अभिनंदन!