सावंतवाडी उपजिल्हा रुग्णालयाच्या वैद्यकीय अधीक्षकपदी डॉ. ज्ञानेश्वर ऐवळे यांची नियुक्ती

सावंतवाडी

सावंतवाडी उपजिल्हा रुग्णालयातील ज्येष्ठ स्त्रीरोग तज्ञ डॉ. ज्ञानेश्वर ऐवळे यांची वैद्यकीय अधीक्षक (वर्ग एक) या पदावर बढती देऊन नियुक्ती करण्यात आली आहे. गेल्या काही वर्षांपासून रिक्त असलेले हे महत्त्वाचे पद अखेर राज्याचे आरोग्य मंत्री आबिटकर यांच्या मान्यतेनंतर भरले गेले आहे.
या नियुक्तीसाठी पालकमंत्री नितेश राणे, आमदार दीपक केसरकर, आमदार रवींद्र चव्हाण, जिल्हा मध्यवर्ती बँकेचे अध्यक्ष मनीष दळवी तसेच युवराज लखमराजे भोसले यांनी विशेष प्रयत्न केल्याची माहिती सूत्रांनी दिली.
डॉ. ज्ञानेश्वर ऐवळे हे गेली तब्बल ३० वर्षे सिंधुदुर्ग जिल्ह्यात स्त्रीरोग तज्ञ म्हणून सेवा बजावत आहेत. सन १९९६ पासून सावंतवाडी व दोडामार्ग या तालुक्यांमध्ये त्यांनी दरमहा सरासरी १०० प्रसूती केसेस यशस्वीपणे हाताळल्या आहेत. १९९८ ते २००६ या कालावधीत त्यांनी सावंतवाडी उपजिल्हा रुग्णालयात स्त्रीरोग तज्ञ म्हणून काम केले. त्यानंतर २००६ ते २०१५-१६ या काळात दोडामार्ग येथे सेवा बजावली. २०१६ ते २०१७ या कालावधीत पुन्हा सावंतवाडीत कार्यरत राहिले, तर २०१७ ते २०२३ या काळात दोडामार्ग ग्रामीण रुग्णालयात त्यांनी आपली सेवा दिली. सन २०२३ पासून ते पुन्हा सावंतवाडी उपजिल्हा रुग्णालयात कार्यरत आहेत.
दीर्घ अनुभव, प्रामाणिक सेवा तसेच मातृ व शिशु आरोग्य क्षेत्रातील उल्लेखनीय योगदानाची दखल घेऊन त्यांची वैद्यकीय अधीक्षकपदी नियुक्ती करण्यात आल्याबद्दल वैद्यकीय वर्तुळासह सर्व स्तरातून त्यांचे अभिनंदन होत आहे.