मुक्ताई ॲकेडमीच्या विद्यार्थ्यांची राष्ट्रीय बुद्धिबळ स्पर्धेत घवघवीत कामगिरी;
अनेकांना आंतरराष्ट्रीय रेटिंग
सावंतवाडी
सावंतवाडी येथील मुक्ताई ॲकेडमीच्या विद्यार्थ्यांनी राष्ट्रीय बुद्धिबळ स्पर्धेत उल्लेखनीय यश संपादन करत आंतरराष्ट्रीय रेटिंग मिळवले आहे. गार्गी सावंत, यश सावंत, पुष्कर केळूसकर, हर्ष राऊळ, अथर्व वेंगुर्लेकर, बृंधव कोटला आणि पूर्वांक कोचरेकर या विद्यार्थ्यांनी आंतरराष्ट्रीय स्तरावर आपली गुणवत्ता सिद्ध केली आहे.
मुक्ताई ॲकेडमीचे अध्यक्ष व बुद्धिबळ प्रशिक्षक श्री. कौस्तुभ पेडणेकर यांच्या मार्गदर्शनाखाली विद्यार्थ्यांनी हे यश प्राप्त केले. सिंधुदुर्ग जिल्ह्यातील तसेच जिल्ह्याबाहेरील राज्य व राष्ट्रीय बुद्धिबळ स्पर्धांमध्ये सहभागी होणाऱ्या अनेक खेळाडूंना त्यांच्या बहुमोल मार्गदर्शनाचा लाभ मिळत असून आतापर्यंत ॲकेडमीचे तब्बल २८ विद्यार्थी आंतरराष्ट्रीय रेटिंगधारक ठरले आहेत.
गेल्या दहा वर्षांत मुक्ताई ॲकेडमीच्या विद्यार्थ्यांनी सातत्याने राष्ट्रीय व आंतरराष्ट्रीय स्पर्धांमध्ये सहभाग घेत अनेक पारितोषिके पटकावली आहेत. ॲकेडमीचा बाळकृष्ण पेडणेकर हा स्टँडर्ड, रॅपिड आणि ब्लिट्झ या तिन्ही प्रकारात जिल्ह्यात सर्वोच्च गुणांकन मिळवणारा आंतरराष्ट्रीय रेटेड खेळाडू ठरला आहे.
याचबरोबर मालवण येथील पन्नास टक्के दृष्टिदोष असलेला मयुरेश परुळेकर तसेच जिल्ह्यातील सर्वात लहान, अवघ्या आठ वर्षांचा पूर्वांक कोचरेकर हेही आंतरराष्ट्रीय रेटेड खेळाडू ठरले आहेत. श्री. कौस्तुभ पेडणेकर सावंतवाडी तालुक्यासह कुडाळ, वेंगुर्ला, दोडामार्ग, कणकवली आणि मालवण येथील विद्यार्थ्यांना नियमितपणे बुद्धिबळ प्रशिक्षण देतात.
दररोज बुद्धिबळ बोर्डवर प्रात्यक्षिकांसह प्रशिक्षण देणारी जिल्ह्यातील एकमेव ॲकेडमी म्हणून मुक्ताई ॲकेडमीची ओळख आहे. विद्यार्थ्यांच्या सातत्यपूर्ण यशामुळे राज्य व राष्ट्रीय स्तरावर “बेस्ट ॲकेडमी” हा मानाचा पुरस्कार मिळवणारी कोकणातील एकमेव ॲकेडमी म्हणून मुक्ताई ॲकेडमीचा गौरव करण्यात येत आहे. या उल्लेखनीय कामगिरीबद्दल सर्व स्तरातून विद्यार्थ्यांचे आणि प्रशिक्षकांचे कौतुक होत आहे.
