ठाणे (गुरुदत्त वाकदेकर) :
ठाणे महानगरपालिकेच्या सन २०२५ मधील सार्वत्रिक निवडणुकीसाठी अनुसूचित जाती (महिला), अनुसूचित जमाती (महिला), नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) आणि सर्वसाधारण (महिला) या प्रवर्गांसाठी आरक्षणाची सोडत आज राम गणेश गडकरी रंगायतन येथे काढण्यात आली. प्रशासक तथा महापालिका आयुक्त सौरभ राव यांच्या अध्यक्षतेखाली ही सोडत प्रक्रिया पार पडली.
या प्रक्रियेत अनुसूचित जाती (महिला) प्रवर्गासाठी ५ जागा, अनुसूचित जमाती (महिला) प्रवर्गासाठी २ जागा, नागरिकांचा मागास प्रवर्ग (महिला) साठी १८ जागा आणि सर्वसाधारण (महिला) प्रवर्गासाठी ४१ जागांची सोडत काढण्यात आली.
महापालिका शाळेतील विद्यार्थिनी पिहू गौंड (इयत्ता आठवी, शाळा क्र. ७) आणि अंशिका प्रजापती यांच्या हस्ते ही आरक्षण सोडत काढण्यात आली. या कार्यक्रमास अतिरिक्त आयुक्त (२) प्रशांत रोडे, उपायुक्त (मुख्यालय) जी. जी. गोदेपुरे, उपायुक्त (निवडणूक) उमेश बिरारी आणि सहाय्यक आयुक्त (निवडणूक) बाळू पिचड उपस्थित होते. संपूर्ण सोडत प्रक्रियेचे नेटके संचालन उपायुक्त (निवडणूक) उमेश बिरारी यांनी केले.
ठाणे महानगरपालिकेच्या सार्वत्रिक निवडणूक २०२५ साठी एकूण लोकसंख्या १८,४१,४८८ इतकी आहे. त्यामध्ये अनुसूचित जातींची लोकसंख्या १,२६,००३ आणि अनुसूचित जमातींची लोकसंख्या ४२,६९८ इतकी आहे. राज्य निवडणूक आयोगाने निश्चित केल्यानुसार, महापालिकेच्या एकूण १३१ जागांपैकी अनुसूचित जातींसाठी ९, अनुसूचित जमातींसाठी ३, नागरिकांचा मागासवर्ग प्रवर्गासाठी ३५ आणि सर्वसाधारण प्रवर्गासाठी ८४ जागा राखीव आहेत. त्यापैकी महिलांसाठी ६६ जागा आरक्षित असून अनुसूचित जाती (महिला) ५, अनुसूचित जमाती (महिला) २, नागरिकांचा मागास प्रवर्ग (महिला) १८ आणि सर्वसाधारण (महिला) प्रवर्गातील ४१ जागा महिलांसाठी राखीव आहेत.
ठाणे महानगरपालिकेत एकूण ३३ प्रभाग असून त्यापैकी ३२ प्रभाग चार सदस्यीय आणि एक प्रभाग तीन सदस्यीय आहे. या ३३ प्रभागांतून ठाणे महानगरपालिकेत एकूण १३१ सदस्य निवडले जाणार असून त्यांची अंतिम प्रभागरचना प्रसिद्ध करण्यात आली आहे.
राज्य निवडणूक आयोगाच्या निर्देशानुसार विविध प्रवर्गातील महिला आरक्षणाची सोडत आज महापालिकेच्या शाळेतील विद्यार्थिनींच्या हस्ते पार पडली. “आता आरक्षण निश्चितीचा टप्पा पूर्ण झाला आहे. त्यावरील हरकती आणि सूचनांसाठी मुदत देण्यात आली असून निवडणुकीच्या पुढील प्रक्रियेसाठी महापालिका प्रशासन पूर्णतः सज्ज आहे,” असे प्रशासक तथा आयुक्त सौरभ राव यांनी स्पष्ट केले.
सोमवार, दि. १७ नोव्हेंबर २०२५ रोजी आरक्षणाचे प्रारूप प्रसिद्ध केले जाईल. सोमवार, दि. १७ नोव्हेंबर ते सोमवार, दि. २४ नोव्हेंबर २०२५ या कालावधीत (दुपारी ३.०० वाजेपर्यंत) नागरिकांना हरकती व सूचना सादर करता येतील. या हरकती व सूचना महानगरपालिका मुख्यालयातील नागरी सुविधा केंद्रात किंवा संबंधित नऊ प्रभाग समिती कार्यालयात सादर कराव्यात, असे आवाहन प्रशासक तथा आयुक्त सौरभ राव यांनी केले आहे. महानगरपालिकेच्या निवडणूक विभागाने स्पष्ट केले आहे की ऑनलाईन किंवा ईमेलद्वारे पाठविलेल्या हरकती स्वीकारल्या जाणार नाहीत. प्राप्त झालेल्या सर्व हरकतींचा विचार करून आरक्षणाची अंतिम अधिसूचना प्रसिद्ध करण्यात येईल.
अनुसूचित जाती (महिला) – ५ जागा, प्रभाग क्रमांक – ३अ, ६अ, ७अ, २२अ, २४अ.
अनुसूचित जमाती (महिला) – २ जागा, प्रभाग क्रमांक – २अ, ५अ.
नागरिकांचा मागास प्रवर्ग (महिला) – १८ जागा, प्रभाग क्रमांक – १ब, ३ब, ६ब, ७ब, ८अ, ९ब, १०अ, १४अ, १५ब, १६ब, १७अ, १९अ, २४ब, २६अ, २८ब, २९अ, ३०ब, ३३ब.
सर्वसाधारण (महिला) – ४१ जागा, प्रभाग क्रमांक – १क, २क, ४ब, ४क, ५क, ८ब, ९क, १०ब, ११ब, ११क, १२ब, १२क, १३ब, १३क, १४ब, १५क, १६क, १७ब, १८ब, १८क, १९ब, २०ब, २०क, २१ब, २१क, २२क, २३ब, २३क, २५ब, २५क, २६ब, २७ब, २७क, २८क, २९ब, ३०ब, ३१ब, ३१क, ३२ब, ३२क, ३३क.
ठाणे महानगरपालिकेच्या एकूण १३१ जागांचा तपशील पुढीलप्रमाणे आहे – सर्वसाधारण प्रवर्ग ४३, सर्वसाधारण (महिला) ४१, नागरिकांचा मागास प्रवर्ग १७, नागरिकांचा मागास प्रवर्ग (महिला) १८, अनुसूचित जाती ४, अनुसूचित जाती (महिला) ५, अनुसूचित जमाती १ आणि अनुसूचित जमाती (महिला) २ जागा.
ठाणे महानगरपालिका प्रशासनाने आरक्षण प्रक्रियेचा महत्त्वाचा टप्पा पूर्ण केला असून आता नागरिकांना हरकती व सूचना नोंदविण्याची संधी उपलब्ध आहे. अंतिम अधिसूचना प्रसिद्ध झाल्यानंतर ठाणे महानगरपालिका सार्वत्रिक निवडणूक २०२५ साठीची पुढील प्रक्रिया औपचारिकरीत्या सुरू होणार आहे.
