कोलगाव ग्रामदेवत श्री देवी सातेरीचा ७ रोजी वार्षिक जत्रोत्सव

सावंतवाडी (प्रतिनिधी) :

कोलगाव येथील ग्रामदेवता श्री देवी सातेरीचा वार्षिक जत्रोत्सव ७ नोव्हेंबर रोजी मोठ्या भक्तीभावात आणि उत्साहात साजरा होणार आहे. या निमित्त मंदिर परिसर फुलांच्या सजावटीने आणि आकर्षक विद्युत रोषणाईने सजविण्यात येणार आहे.

सकाळी श्री देवी सातेरीची पूजा-अर्चा, त्यानंतर आकर्षक स्वरूपात पुन्हा पूजन, दुपारी मानाचे नैवेद्य तसेच ओटी भरण्याचा कार्यक्रम होणार आहे. रात्री १२ वाजता मंदिराभोवती होळताशांच्या आणि फटाक्यांच्या आतषबाजीसह मंदिरात पालखी मिरवणूक काढण्यात येईल.

रात्री 1 वाजता पार्सेकर पारंपारिक दशावतार नाट्य मंडळाचा नाट्यप्रयोग सादर करण्यात येणार आहे. भाविकांनी मोठ्या संख्येने उपस्थित राहून दर्शनाचा लाभ घ्यावा, असे आवाहन श्री देवी सातेरी देवस्थान समितीच्या वतीने करण्यात आले आहे.