प्रांताधिकारी ऐश्वर्या काळुसे यांच्या उपस्थितीत तहसील कार्यालयात सोडत; नागरिक, उमेदवार आणि पक्षप्रतिनिधींच्या उपस्थितीत प्रक्रिया पार

कुडाळ :

राज्य निवडणूक आयोगाच्या निर्देशानुसार कुडाळ पंचायत समिती सदस्य पदांसाठीच्या आरक्षण निश्चितीची सोडत आज तहसीलदार कार्यालयात जाहीर करण्यात आली.

अनुसूचित जाती, जमाती, महिला व इतर मागासवर्गीय उमेदवारांसाठी आरक्षण ठरविण्याची ही सोडत प्रक्रिया पारदर्शकपणे आणि सर्वांच्या उपस्थितीत पार पडली. प्रांताधिकारी ऐश्वर्या काळुसे यांच्या उपस्थितीत तहसीलदार वीरसिंग वसावे यांनी एकूण १८ गणांसाठी आरक्षण जाहीर केले.

अनुसूचित जमातींची लोकसंख्या पुरुषी नसल्याने त्यांचे आरक्षण जाहीर करण्यात आले नाही. त्यामुळे सुरुवातीला पावशी प्रभागापासून सोडत सुरू करण्यात आली. पावशीमध्ये अनुसूचित जाती आरक्षण निश्चित झाले असून महिलांसाठी आरक्षण जाहीर करण्यात आले आहे. त्यानंतर नागरिकांच्या मागास प्रवर्ग सर्वसाधारण आणि महिलांसाठी आरक्षण निश्चित करण्यात आले.

आंब्रड, डिगस नागरिकांचा मागास प्रवर्ग, गाठोस आणि घावनळे गावांमध्ये नागरिकांचा मागास प्रवर्ग महिला आरक्षण ठरले. उरलेल्या १३ गणासाठी सर्वसाधारण आरक्षण जाहीर करण्यात आले. तर जांभवडे, कसाल, ओरोस बु. तेंडोली, साळगाव, माणगाव, झाराप याठिकाणी सर्वसाधारण तर आवळेगाव, वेताळबांबर्डे, नेरुर देऊळवाडा उत्तर-दक्षिण, पाट, पिंगुळी या गावांसाठी सर्वसाधारण महिला आरक्षण निश्चित झाले.

या सोडतीदरम्यान रणवीर गावडे आणि श्रुती गावडे या शाळकरी मुलांनी आरक्षणाच्या चिठ्ठ्या काढल्या. यावेळी प्रांताधिकारी ऐश्वर्या काळुसे, तहसीलदार वीरसिंग वसावे, नायब तहसीलदार अमरसिंह जाधव, श्री. गवस तसेच संबंधित कर्मचारी उपस्थित होते. या सोडतीसाठी राजकीय पक्षांचे प्रतिनिधी, इच्छुक उमेदवार आणि नागरिक मोठ्या संख्येने उपस्थित होते.