कणकवली :
सिंधुदुर्ग जिल्हा बँकेच्या फसवणूक प्रकरणात माझ्यासह आठ जणांची चौकशी सुरू असून, या संदर्भात अद्याप अधिकृत नोटीस मिळालेली नाही. मात्र जिल्हा बँकेत सुरू असलेल्या अनागोंदी कारभाराची चौकशी व्हावी, अशी मागणी मी पोलिस महासंचालकांकडे केली आहे, असा खुलासा आमदार तथा शिवसेना नेते राजन तेली यांनी आज केला.
ते म्हणाले की, “जिल्हा बँक बदनाम करण्यासाठी तसेच चुकीचे काम करवून घेण्यासाठी पालकमंत्री नितेश राणे दबावतंत्राचा वापर करत आहेत. माझ्याविरोधात राजकीय सूडभावनेतून ही कारवाई केली जात आहे. मी चुकीची तक्रार केल्याचे बोलले जात असले तरी माझ्या भूमिकेवर मी ठाम आहे.”
आमदार तेली यांनी पुढे सांगितले की, “जिल्हा बँक आणि सहकारी क्षेत्र वाचवण्यासाठीच माझा आवाज उठला आहे. मी मुख्यमंत्री व उपमुख्यमंत्र्यांनाही याबाबत माहिती दिली आहे.”
जिल्हा बँक फसवणूक प्रकरणी आमदार तेली यांच्यासह आठ जणांची चौकशी केंद्रीय स्तरावर सुरू असून, याबाबतच्या बातम्या विरोधकांकडून पसरवल्या जात आहेत. “या सर्व आरोपांना माझ्याकडे ठोस उत्तर आहे,” असे प्रतिपादन आमदार राजन तेली यांनी या पार्श्वभूमीवर केले.
