सावंतवाडी शहरात आयोजित कार्यक्रमात गोरगरीबांसाठी कार्यरत राहण्याची कार्यकर्त्यांची प्रतिज्ञा

सावंतवाडी :

भारतीय जनसंघाचे संस्थापक व एकात्म मानवतावादाचे प्रणेते पंडित दीनदयाळ उपाध्याय यांच्या जयंतीनिमित्त सावंतवाडी शहरात भारतीय जनता पार्टीच्या वतीने विशेष कार्यक्रमाचे आयोजन करण्यात आले. देशभरात उत्साहात साजऱ्या होणाऱ्या या जयंतीनिमित्त शहरातील भाजप कार्यकर्त्यांनी समाजातील तळागाळातील गोरगरीब जनतेसाठी सेवाभावी कार्य करण्याचा संकल्प केला.

भाजप युवा नेते विशाल परब यांनी उपाध्याय यांच्या प्रतिमेस पुष्पहार अर्पण करून अभिवादन केले. यावेळी बोलताना त्यांनी सांगितले की, पंडित दीनदयाळ उपाध्याय हे केवळ पक्ष संघटनेचे शिल्पकार नव्हते तर सामाजिक सेवाभाव आणि कर्तव्यनिष्ठेचे प्रेरणास्थान होते. त्यांचे विचार आणि आदर्श हे आमच्यासारख्या कार्यकर्त्यांसाठी सदैव दिशादर्शक आहेत. त्यांनी निर्माण केलेल्या मूल्यांच्या आधारावरच आम्ही विविध सेवा कार्यक्रम राबवत आहोत आणि पुढेही हे कार्य अखंडपणे सुरू राहील, असे त्यांनी प्रतिपादन केले.

या कार्यक्रमाला सावंतवाडी शहर मंडल अध्यक्ष सुधीर आडिवरेकर, मंडल सरचिटणीस दिलीप भालेकर, मनोज नाईक, अमित परब, शहर चिटणीस संजू शिरोडकर, तसेच अमेय पै, साईनाथ जामदार, सॅबिस्टन फर्नांडिस, कुणाल सावंत, नागेश जगताप, धीरेंद्र म्हापसेकर यांसह अनेक मान्यवरांची उपस्थिती होती.