*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*
*’ माय माहेरवाशीण ‘*
आली गौराई माहेरी
सोन्या मोत्यांच्या पावली
तिचे येणे मांगल्याचे
गणरायाची माऊली ||
आली माहेरवाशीण
कोड कौतुक मायेचे
ताट सजे नैवेद्याचे
केले रांधण प्रेमाचे ||
ज्ञान आरोग्य सन्मती
क्षेम हीत कुटुंबाचे
समृद्धीचे वरदान
तिच्या शुभ आशीर्वचे ||
तिच्या कृपेने जीवनी
नाही कशाची ददात
ठेव माऊली सुखात
घरदार गणगोत ||
देई माये सकलांना
तुझी छत्रछाया शिरी
राही सुबत्ता नात्यांची
माझ्या भरल्या संसारी ||
माझी माऊली दयाळु
कृपा करी सर्वांवरी
तुझ्या समृद्धीच्या खुणा
ठेव आई घरी दारी ||
*ज्योत्स्ना तानवडे. पुणे*
