विधानसभा प्रमुख रूपेश राऊळ यांचा उपक्रम

सावंतवाडी :

सावंतवाडी रोड रेल्वे स्थानकावर प्रवाशांच्या सोयीसाठी ठाकरे गटाचे विधानसभा प्रमुख रूपेश राऊळ यांच्या पुढाकाराने दोन नवीन व्हीलचेअर उपलब्ध करून देण्यात आल्या. विशेषतः ज्येष्ठ नागरिक, दिव्यांग आणि आजारी प्रवाशांना यामुळे मोठा दिलासा मिळणार आहे.

गेल्या काही दिवसांपासून प्लॅटफॉर्म क्रमांक ३ वर जाण्यासाठी वृद्ध व दिव्यांग प्रवाशांना मोठ्या अडचणी येत होत्या. ही गैरसोय लक्षात घेऊन रेल्वे अधिकाऱ्यांशी चर्चेनंतर व्हीलचेअर देण्याचा निर्णय घेण्यात आला. आज तुतारी एक्सप्रेस सुटण्यापूर्वी या व्हीलचेअर्स स्थानक प्रमुखांकडे सुपूर्द करण्यात आल्या.

यावेळी बोलताना रूपेश राऊळ म्हणाले, “गणेशोत्सव काळात मोठ्या संख्येने प्रवासी येणार आहेत. या व्हीलचेअर्समुळे गरजू प्रवाशांची गैरसोय दूर होईल. ठाकरे शिवसेना नेहमीच पायाभूत सुविधा व स्वच्छतेसाठी सहकार्य करीत राहील.”

या सेवेबद्दल स्टेशन मास्तर दिनेश चव्हाण यांनी प्रवाशांच्या वतीने आभार मानले. या प्रसंगी माजी सभापती रमेश गावकर, वेत्ये सरपंच गुणाजी गावडे, आरोंदा उपसरपंच आबा केरकर, कोकण रेल्वेचे एरिया सुपरवायझर विजय सामंत, सिनियर स्टेशन मास्तर दिनेश चव्हाण, अनुराधा पवार, लक्ष्मण परब, शिवसेनेचे विभागप्रमुख सुनील गावडे,विनोद काजरेकर, संजय तानावडे, संतोष गावडे, सचिन मुळीक, रोहन मल्हार तसेच शिवसेनेचे पदाधिकारी व कार्यकर्ते उपस्थित होते.

रूपेश राऊळ यांनी प्रवाशांना आवाहन केले की, “सावंतवाडी टर्मिनसवर उपलब्ध व्हीलचेअर्सचा गरजूंनी योग्य उपयोग करून घ्यावा.”