*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*
*सया जमता अंगणी !!*
आला श्रावण महिना
लेक आली माहेराला
मेळा जमे अंगणात
सया आल्या खेळायला ||
नागपंचमीचा सण
झोका झाडाला बांधला
खेळ रंगला सख्यांचा
स्वर आभाळी पोचला ||
किती चालतो हा दंगा
जणू चिमण्या जमल्या
मुक्तपणे बागडणे
सारा ताण विसरल्या ||
हास्य विनोदाने त्यांच्या
बालपण परतले
आता लेकीला पाहून
डोळे आईचे भरले ||
बाईपण निभावता
जाते माहेर बाजूला
माहेराच्या अंगणात
ठेवी सासर बाजूला
माहेरच्या आठवणी
त्यांच्या आनंदाचा ठेवा
संसारात रमताना
सदा सुखी ठेवी देवा ||
ज्योत्स्ना तानवडे. पुणे
