*मनस्पर्शी साहित्य व कला क्रीडा प्रतिष्ठानच्या सन्माननीय सदस्य ज्येष्ठ लेखिका कवयित्री अरुणा गर्जे लिखित अप्रतिम अभंग रचना*

*श्री स्वामी समर्थ…*

योगियांचा राजा | तू रे योगिराज |

स्वामी महाराज | श्री समर्था ||

तुझा रे निवास | वटवृक्षाखाली |

धरी तू सावली | भक्तांवरी ||

भिऊ तू नकोस | आहे मी पाठीशी |

हेची तू सांगशी | साऱ्या भक्ता ||

किरण दाविशी | सदा रे आशेचा |

आधार शब्दांचा | तुझ्या वाटे ||

आमुची तू माता | आमुचा तू पिता |

आमुचा तू त्राता | सर्वकाळ ||

असू दे कृपेचा | हात रे मस्तकी |

नको काही बाकी |मला देवा ||

श्री स्वामी समर्थ | साऱ्या रे जगाचा |

शुद्ध करी वाचा | माझी देवा ||

म्हणेन आरती | गाईन अभंग |

नामात रे दंग | राहीन मी ||

उचलू पालखी | धरू खांद्यावरी |

दत्त अवतारी | समर्थाची ||

कोणत्या रुपात | येशील धावून |

हेची सांगे मन | वेळोवेळी ||

आली रे प्रचिती | सदा तू राहशी |

आमच्या पाठीशी | श्री समर्था ||

@अरुणा गर्जे

नांदेड