आमदार निलेश राणे यांच्या हस्ते महोत्सवाचा शुभारंभ

कुडाळ :

महायुतीच्या वतीने आमदार निलेश राणे यांच्या संकल्पनेतून आज २९ मार्च आणि ३० मार्च ला कुडाळ येथे भव्य रोंबाट, राधा नृत्य आणि चित्ररथ स्पर्धेचे आयोजन करण्यात आले आहे. त्याची तयारी अंतिम टप्प्यात आली आहे, अशी माहिती महायुतीच्या वतीने राष्ट्रवादी काँग्रेसचे जिल्हा कार्याध्यक्ष काका कुडाळकर यांनी पत्रकार परिषदेत दिली. दरम्यान गुढीपाडव्याला काढण्यात येणाऱ्या नववर्षाचे स्वागत यात्रेत गोव्यातले भव्य देखावे चित्ररथाच्या माध्यमातून सहभागी होणार आहेत. कुडाळ तहसील नजीकच्या मैदानावर हा सोहळा होणार आहे.

कुडाळ महायुतीच्या कार्यालय घेतलेल्या पत्रकार परिषदेत श्री कुडाळकर बोलत होते. यावेळी शिवसेना नेते संजय पडते, उपजिल्हाप्रमुख आनंद शिरवलकर, महिला जिल्हाप्रमुख वर्षा कुडाळकर आदी उपस्थित होते.

यावेळी श्री कुडाळकर म्हणाले आम. निलेश राणे यांच्या संकल्पनेतून कुडाळ येथील शिमगोत्सव कार्यक्रम भव्य दिव्य असा होणार आहे. आज शनिवारी सायंकाळी ७ वाजता या महोत्सव कार्यक्रमाचा आम. निलेश राणे यांच्या हस्ते श्रीफळ वाढवून शुभारंभ होणार आहे. उद्या म्हणजे रविवार दिनांक ३० मार्च रोजी गुढीपाडव्याच्या दिवशी कुडाळ विधानसभा मतदारसंघात प्रथमच हिंदू नववर्षाला कुडाळ मधील जनतेला आम. निलेश राणे शुभेच्छा देतील विशेष म्हणजे या दिवशी कुडाळ शहरात भव्य अशी शोभायात्रा काढण्यात येणार आहे. या शोभा यात्रेत गोव्यातील खास चार आकर्षक देखावे दाखल होणार आहे. शोभा यात्रेची सुरुवात कुडाळ कॉलेज चौक – पोलीस स्टेशन – जिजामाता चौक – गांधी चौक ते गुलमोहर हॉटेल पर्यंत होणार आहे. कुडाळ जिजामाता चौक येथे रॅलीमध्ये स्वतः आमदार निलेश राणे सहभागी होणार आहे. गुढीपाडव्यादिवशी एक नवीन संदेश देण्याचं काम आम. निलेश राणे करणार आहे. या शिमगोत्सवाच्या सादरीकरणातून लोकांना अधिकाधिक आनंद देण्याचा आमचा प्रयत्न राहणार आहे. या महोत्सवात अधिकाधिक राधा नृत्य सादर केली जातील, अशी माहिती कुडाळकर यांनी दिली.