आरोंदा-सावरजुआ येथे घरफोडी, साडेचार लाखाचे दागिने लंपास..

चोरटा सीसीटीव्हीत कैद; सावंतवाडी पोलिस ठाण्यात अज्ञाताच्या विरोधात गुन्हा दाखल…

सावंतवाडी

आरोंदा- सावरजुआ येथील गीता हनुमंत गावडे यांच्या घरात अज्ञात चोरट्याने घुसून तब्बल साडेचार लाख रुपयांचे सोन्याचे दागिने लंपास केले आहेत. हा प्रकार उघडकीस आल्यानंतर त्यांनी सावंतवाडी पोलीस ठाण्यात याबाबतची तक्रार दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे.

ही घटना काल साडेबारा वाजता घडली. संशयित सफेद रंगाचे टी-शर्ट व काळ्या रंगाची पॅन्ट घातलेल्या अवस्थेत आहे. तो सीसीटीव्ही मध्ये कैद झाला असून त्या पुराव्याच्या आधारे त्याचा पोलीस शोध घेत आहे.

याबाबत अधिक माहिती अशी की, आरोंदा- सावरजुवा येथे राहणाऱ्या गीता गावडे या कामानिमित्त बाहेर गेल्या होत्या. त्यावेळी घरात कोणी नसल्याची संधी साधून त्यांच्या घराच्या वरच्या बाजूला असलेल्या खोलीत चोर वाटेने प्रवेश करून बेडच्या खाली ठेवलेल्या पुठ्ठ्याच्या खोकातील स्टीलच्या डब्यात ठेवलेले दागिने त्याने चोरून नेले. यात दोन बांगड्या, एक मंगळसूत्र, एक ब्रेसलेट, दोन झुमके, दोन कानातली कुडी असा ४ लाख ६२ हजारांचा मुद्देमाल लंपास करण्यात आला आहे. दरम्यान या प्रकरणी अज्ञात चोरट्यावर पोलिसांनी गुन्हा दाखल केला.