*आमदार तथा माजी कॅबिनेट मंत्री दीपक केसरकर यांच्या शुभहस्ते होणार भूमिपूजन*
सावंतवाडी :
श्री दत्त मंदिर व श्री वासुदेवानंद सरस्वती मंदिर सबनीसवाडा सावंतवाडी येथे पर्यटन व सांस्कृतिक कार्य विभाग, मुंबई यांजकडून प्रादेशिक पर्यटन विकास योजनेअंतर्गत भक्तनिवास व सुशोभीकरण काम मंजूर झालेले असून सदर कामाचा भूमिपूजन सोहळा सन्मा.आमदार तथा माजी शालेय शिक्षण व मराठी भाषा मंत्री श्री.दीपकभाई केसरकर यांच्या शुभहस्ते शनिवार दि. ०८ मार्च २०२५ रोजी सकाळी ०९.४५ वा. आयोजित करण्यात आला आहे.
एकमुखी दत्त मंदिराच्या मागील जागेत ४ कोटी ३४ लाख ९४ हजार रुपये खर्चून भव्यदिव्य असे भक्तनिवास उभे केले जाणार असून मंदिराच्या समोरील उजव्या बाजूच्या जागेत सुसज्ज अन्नपूर्णा इमारत बांधली जाणार आहे. यामध्ये दत्त भक्तांना निवास तसेच योगा हॉल, पुजाऱ्यांना राहण्यासाठी सुसज्ज खोली आदी सुविधा निर्माण केल्या आहेत. त्यामुळे भविष्यात दत्तमंदिरच्या भक्तनिवासाच्या माध्यमातून भाविक भक्तगणांची राहण्याची उत्तम सोय होणार आहे.
सदर भूमिपूजन सोहळ्यासाठी सर्वांनी आवर्जून उपस्थित रहावे अशी विनंती श्री दत्तमंदिर व श्री वासुदेवानंद सरस्वती मंदिर व्यवस्थापन उपसमिती, सावंतवाडी यांजकडून करण्यात आली आहे.
