‘अन्नपुर्णा टेक सोर्स ॲण्ड गो सोर्स’ च्या दुसऱ्या टप्प्याचे ‘ग्रँड ओपनिंग ‘
आय टी क्षेत्रात जिल्ह्यातील युवकांसाठी १० हजार रोजगार उपलब्ध करण्याचा संकल्प
विविध क्षेत्रातील मान्यवरांकडून शुभेच्छांचा वर्षाव
सावंतवाडी
‘अन्नपुर्णा टेक सोर्स ॲण्ड गो सोर्स ‘च्या माध्यमातून पहिल्या टप्प्यात ४५ स्थानिक युवकांना रोजगार दिल्यानंतर यामाध्यमातून आणखीन ६५ स्थानिक तरूण-तरूणींना रोजगाराची संधी उपलब्ध करण्यात आली आहे. तर भविष्यात ग्रामीण भागातील १० हजार युवकांना रोजगार उपलब्ध करून देण्याचा आमचा मानस आहे आणि आम्ही तो निश्चितच पूर्ण करू, असा विश्वास अन्नपुर्णा टेक सोर्सच्या सीईओ सौ.अन्नपुर्णा कोरगावकर व गो सोर्सचे सीईओ संतोष कानसे यांनी व्यक्त केला.
माजगाव उद्यमनगर येथील ‘अन्नपुर्णा टेक सोर्स आणि गो सोर्स ‘या आय टी क्षेत्रातील उद्योगसमूहाच्या दुसऱ्या टप्प्याचा शुभारंभ मान्यवरांच्या उपस्थितीत संपन्न झाला. उद्घाटन कार्यक्रमानंतर पत्रकारांशी संवाद साधताना त्यांनी कंपनीच्या भविष्यातील वाटचाली संदर्भात माहिती दिली.
ते म्हणाले, शहरी भागापेक्षा ग्रामीण भागातील सुशिक्षित बेरोजगार युवक युवतींना नोकरीची अधिक गरज आहे आणि आम्ही ती या माध्यमातून उपलब्ध करून देत आहोत. पुढील कालावधीत रात्री बरोबरच दिवसादेखील काम सुरू करण्यात येणार असून त्यासाठी जिल्ह्यातील जास्तीत जास्त युवक युवतीने संपर्क साधावा असे आवाहन त्यांनी यावेळी केले.
या उद्घाटन सोहळ्याचा शुभारंभ श्रीरंग मंजूनाथ आचार्य व ॲड. पुष्पलता कोरगावकर यांच्या हस्ते दीपप्रज्वलनाने झाला. तसेच गो सोर्सचे मॅनेजिंग पार्टनर डेव्हिड क्लेमन्स, हेंसल डॉब्स, सीएसओ डेरिक पर्किन्स आदींच्या हस्ते फित कापून नव्या विस्तारीत कार्यालयाचं उद्घाटन करण्यात आलं.
याप्रसंगी अन्नपुर्णा टेक सोर्सच्या सीईओ सौ.अन्नपुर्णा कोरगावकर, गो सोर्सचे सीईओ संतोष कानसे, अन्नपूर्णा टेक सोर्सच्या प्रोप्रायटर ऐश्वर्या कोरगावकर, व्ही पी नटवर शर्मा, सीओओ राहूल मिश्रा, भिकाजी कानसे, ॲड. पुष्पलता कोरगावकर, श्रीरंग मंजूनाथ आचार्य, अखिलेश कोरगावकर, प्रसाद कोरगावकर , व्यंकटेश शेट आदींसह मान्यवर उपस्थित होते.
यावेळी खास यु एस मधून उपस्थित राहिलेल्या मान्यवरांनी देखील शुभेच्छा दिल्या. खास या सोहळ्यासाठी अमेरिकेतून साडेआठ हजार मैल अंतर कापून आम्ही पहिल्यांदाच भारतात आलो आहोत. येथील जनजीवन निसर्ग व एकूणच संस्कृती आपलेपणा पाहून नक्कीच आम्ही भारावून गेलो आहोत. भारतातील मुलांसोबत पार्टनरशिप करणं हे आम्ही आमचे भाग्य समजतो. इथून जाताना येथील गोड आठवणी आम्ही निश्चितच सोबत घेऊन जाऊ. त्या कंपनीच्या भविष्यकालीन वाटचालीस आमच्या शुभेच्छा असून त्यांच्या वाटचालीत आम्ही त्यांना जास्तीत जास्त सहकार्य करू, असा विश्वास त्यांनी यावेळी व्यक्त केला.
या सोहळ्याच्या निमित्ताने विविध स्तरातील मान्यवरांनी कोरगावकर कुटुंबियांना शुभेच्छा देत स्थानिक युवकांना रोजगार उपलब्ध करून देण्यासाठी घेतलेल्या मेहनतीबद्दल कौतुक केले. यावेळी माजगाव सरपंच डॉ. अर्चना सावंत, युवा नेते दिनेश गावडे, भाजपा कृषी मोर्चाचे जिल्हा सरचिटणीस अजय सावंत, मोहन शेट, कृष्णा शेट, विराग मडकईकर, अवधूत नाटेकर, संतोष गांवस, दया परब आदींसह विविध क्षेत्रातील मान्यवर मंडळी उपस्थित होते.
या प्रसंगी माजी शालेय शिक्षणमंत्री दीपक केसरकर यांनी ऑनलाईन पद्धतीने या सोहळ्यास व पुढील वाटचालीसाठी शुभेच्छा दिल्या.
