मालवणात उद्या भव्य शस्त्र प्रदर्शन…

बजरंग दल, शिवशंभू विचार मंचचे आयोजन ; अभय राजे जगताप यांचेही व्याख्यान…

मालवण

विश्व हिंदू परिषद अंतर्गत बजरंग दल मालवण व शिवशंभू विचार मंच ठाणे यांच्यावतीने २६ ऑक्टोबर रोजी पालिकेच्या मामा वरेरकर नाट्यगृह येथे शस्त्र प्रदर्शन तसेच छत्रपती श्री शिवराय झाले नसते तर या विषयावर अभयराजे जगताप यांच्या व्याख्यानाचे आयोजन करण्यात आले आहे.

शिव शंभु विचार मंच ठाणे येथे कार्यरत असून विविध उपक्रम घेऊन जन माणसांमध्ये इतिहास या विषयावर मार्गदर्शनपर शिबीर आयोजित करते. छत्रपती शिवाजी महाराज आणि त्यांच्या संपूर्ण चरित्राची माहिती प्रत्येकाला व्हावी म्हणून शिवशंभू विचार दर्शन मार्फत शिवकालीन शस्त्र व छायाचित्र प्रदर्शन येथे लावण्यात येत आहे. छायाचित्रांसोबत शिवकालीन नाणी, मोडी लिपीतील पत्र, ग्रंथ प्रदर्शनात मांडली जाणार आहेत. भारतीय टपाल खात्याने प्रकाशित केलेली काही विशेष लिफाफे आणि पोस्टल तिकीट देखील येथे पाहायला मिळणार आहेत. विविध मंदिरातील व लेण्यांमध्ये कोरलेले बैठ्या खेळांच्या प्रतिकृती देखील असणार आहेत. सकाळी १० ते सायंकाळी ७ हे प्रदर्शन सर्वांसाठी खुले असणार आहे.

याचदिवशी सायंकाळी ५.३० वाजता छत्रपती श्री शिवराय झाले नसते तर या विषयावर अभयराजे जगताप यांचे व्याख्यान होणार आहे. तरी या कार्यक्रमाचा नागरिकांनी लाभ घ्यावा असे आवाहन आयोजकांच्या वतीने करण्यात आले आहे.