कणकवलीत २ ऑक्टोबरला युवक महोत्सव

कणकवली

यशवंतराव चव्हाण महाराष्ट्र मुक्त विद्यापीठ नाशिकचा २२ वा विभागीय युवक महोत्सव २ ऑक्टोबरला कणकवली महाविद्यालय येथे आयोजित करण्यात आला आहे. कोल्हापूर केंद्रांतर्गत सिंधुदुर्ग, रत्नागिरी, सांगली, कोल्हापूर असे चार जिल्हे महोत्सवात सहभागी असणार आहेत. महोत्सवामध्ये संगीत, नृत्य, नाट्य, ललित कला, वाङ्मय अशा ३६ कला प्रकारांची स्पर्धा होणार आहे. २५ वर्षे वयोगटातील मुक्त विद्यापीठाचे विद्यार्थी महोत्सवात सहभागी होऊ शकतात. तर येथे निवड झालेले विद्यार्थी विद्यापीठ स्तरावरील नाशिक येथील केंद्रीय युवक महोत्सवात सहभागी होऊ शकतात. नाशिक येथील महोत्सवात निवड झालेले विद्यार्थी इंद्रधनुष्य या २२ विद्यापीठाच्या महोत्सवात सहभाग नोंदवू शकतात. पुढे झोनल व नॅशनल अशी स्पर्धा होणार आहे. महोत्सवात सहभागी सहभागी होऊ इच्छिणाऱ्या विद्यार्थ्यांनी आपल्या केंद्रामार्फत कणकवली कॉलेज अभ्यास केंद्राशी संपर्क साधावा, असे आवाहन प्राचार्य युवराज महालिंगे, प्रा. हरिभाऊ भिसे (८४३२५४७६६७) यांनी केले.