*जागतिक साहित्य कला व्यक्तित्व विकास मंचाच्या सन्माननीय सदस्य ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*

आषाढस्य प्रथम दिने |

     *मेघा रे मेघा !*

पावसाळी धुंद वेळा

मेघ बरसू लागलेले

आणि माझ्या अंतरंगा

भावनेने छेडलेले ||

पावसाची लागली झड

एकटा मी या क्षणाला

आठवांनी साजणीच्या

वेदना जाळी मनाला ||

तू प्रवासी अंबराचा

याच मार्गानेच जा रे

वाट माझ्याही गृहाची

शोधूनी तू काढ ना रे ||

हे नभा तू दूत माझा

होऊनी जा मम गृहाला

प्रेम माझ्या अंतरीचे

सांग माझ्या प्रेयसीला ||

एकटा मी येथ आहे

चिंतनी माझ्या प्रियेच्या

सांग तिजला क्षेम माझे

सांत्वना दे अंतरीच्या ||

ज्योत्स्ना तानवडे. पुणे