*जागतिक साहित्य कला व्यक्तित्व विकास मंच तथा लालित्य नक्षत्रवेल समूहाच्या सन्माननीय सदस्या ज्येष्ठ लेखिका कवयित्री सौ.मंजिरी अनसिंगकर लिखित अप्रतिम काव्यरचना*

*हिरवा मृदगंधी नजारा*

रिमझिम रिमझिम पाऊस धारा

हिरवा ओलेता मृद् गंधी नजारा||धृ||

निळ्या आभाळी सावळ मेघांची दाटी

सुरेख नर्तन ते बिजलीचे पाठी

शीळ घालीत घुमतो,बनांत वारा

हिरवा ओलेता मृद् गंधी नजारा||१||

इंद्र धनुची कमान नभी देखणी व्योमकेशी विहरती,पक्षी पक्षिणी

सोनकवडशांचा खेळ चाले सारा

हिरवा ओलेता मृद्ग गंधी नजारा||२||

भिजल्या वेली नि भिजले तरूवर

सुस्नात धरणी,प्रसन्न चराचर

गवत फुलांचा हा रंगीत पसारा

हिरवा ओलेता मृद् गंधी नजारा||३||

धुंदावे तरूणाई,नाचे तनमन

आनंदाने फुलतो,क्षण न् क्षण

उमटतो रोमांचक गोड शहारा

हिरवा ओलेता मृद् गंधी नजारा.||४||

सृजनाचे लेणे लेवूनी अवनी

नटली सजली,लाजली धरणी

तृप्त होऊनी,भरला मनगाभारा

हिरवा ओलेता मृद् गंधी नजारा||५||

सौ.मंजिरी अनसिंगकर नागपूर