*जागतिक साहित्य कला व्यक्तित्व विकास मंच तथा लालित्य नक्षत्रवेल समूहाच्या सदस्या ज्येष्ठ लेखिका कवयित्री सौ मंजिरी अनसिंगकर लिखित अप्रतिम अष्टाक्षरी काव्यरचना*

अध्याय पाचवा 

*(श्री गजानन विजय ग्रंथ)*

अनुपम गुरू भक्त

“जोडी” श्री नि भास्कराची

कथा पांचव्या अध्यायी

ऐका आगळ्या नात्याची ||

सोळा कलांनी तापला

सूर्यदेव वैशाखात

वायुगतीसम चाल

महाराज ते तृषार्त ||

कृषीवल भास्कराने

जल घागर आणली

शेतामध्ये करी काम

झुडुपात लपवली ||

पाणी मागितले “श्रींनी”

भास्कराने नाकारले

मिळणार न आयते

भास्कराने सांगितले ||

डोकावती महाराज 

जवळच्या गर्दाडात

वर्षे द्वादश हा शुष्क

पाणी नाही या कोसात ||

भान समाजहिताचे

“श्रींनी” प्रार्थिले ईशास

तळमळ प्रार्थनेत

झरे फुटले कूपास ||

गोड शीत स्वच्छ जल

पहाताच भास्कराने

पाय धरिले हो “श्रींचे”

शुद्ध अंतःकरणाने ||

भास्कराने क्षणार्धात

त्याग केला संसाराचा

मळा लावण्या भक्तीचा

सन्नीतीच्या सुफळांचा ||

पहा संतसंगतीचा

सकारात्म परिणाम

निजहित साधण्यास

उपयोगी संतनाम ||

©️®️

सौ.मंजिरी अनसिंगकर 

नागपूर.