सिंधुदुर्गात ९ हजार ३४९ मतदारांची नव्याने भर…

जिल्हाधिकाऱ्यांची माहिती; मयत आणि स्थलांतरित झाल्याने २३ हजार मतदार वगळले

सावंतवाडी

सिंधुदुर्ग जिल्ह्यात एकूण ६ लाख ५७ हजार ७७१ मतदारांची यादी निश्चित करण्यात आली आहे. यात ९ हजार ३४९ मतदारांची नव्याने भर पडली आहे. मयत आणि स्थलांतरित झाल्यामुळे २३ हजार ९१६ मतदारांची नावे वगळण्यात आली आहे तर नव्याने ३ हजार २७४ युवा मतदारांची नोंद झाली आहे, अशी माहिती आज येथे आयोजित करण्यात आलेल्या पत्रकार परिषदेत जिल्हाधिकारी तथा जिल्हा निवडणूक अधिकारी किशोर तावडे यांनी दिली. मतदारांची माहिती देण्यासाठी श्री. तावडे यांनी आज येथे पत्रकार परिषद घेतली.

यावेळी निवडणूक उपजिल्हाधिकारी श्रीकांत गायकवाड उपस्थित होते. यावेळी जिल्हाधिकारी श्री. तावडे म्हणाले, यावर्षी राज्यात लोकसभा आणि विधानसभा या दोन महत्त्वाच्या निवडणुका घेण्यात येणार आहेत. या पाश्वभूमीवर राज्यात मतदार याद्यांच्या अद्यावतीकरणासाठी विशेष संक्षिप्त पुनरीक्षण कार्यक्रम तसेच घरोघरी सर्वेक्षणाची मोहीम राबवण्यात आली होती. या विशेष संक्षिप्त पुनरीक्षण कार्यक्रमात राबवण्यात आलेल्या मोहिमांमुळे अंतिम मतदार यादीत दुबार, स्थलांतरित व मयत मतदारांची वगळणी करण्यात आली, असे त्यांनी सांगितले.