गोवा सीमेवरून येणाऱ्या अंमली पदार्थांवर सिंधुदुर्ग प्रशासनाचा कडक बंधोबस्त

शिरोडा–वेळागर किनारपट्टीवर विशेष तपासणी; संशयास्पद हालचालींवर बारीक नजर

सिंधुदुर्गनगरी

जिल्ह्याला लागून असलेल्या गोवा सीमेवरून शिरोडा व वेळागर सारख्या पर्यटन स्थळांवर येणाऱ्या परदेशी पर्यटकांकडून अंमली पदार्थांची विक्री व सेवन होण्याची शक्यता लक्षात घेऊन प्रशासन सतर्क झाले आहे. निवासी उपजिल्हाधिकारी मच्छिंद्र सुकटे यांनी या भागात विशेष खबरदारी घेत कडक तपासणी करण्याचे आदेश दिले आहेत.
गोव्याहून जलमार्गाने अथवा दुचाकीवरून येणाऱ्या संशयास्पद हालचालींवर लक्ष ठेवण्याच्या सूचना देत, अंमली पदार्थांचे समूळ उच्चाटन करण्यासाठी सर्व विभागांनी पोलीस प्रशासनाशी समन्वय ठेवावा, असे त्यांनी स्पष्ट केले.
➡️ कार्यकारी समितीच्या बैठकीत कडक निर्देश
जिल्हाधिकारी कार्यालयात झालेल्या अंमली पदार्थ विरोधी कार्यकारी समितीच्या बैठकीत बोलताना सुकटे यांनी जिल्ह्यातील अंमली पदार्थांची विक्री, वाहतूक व सेवन करणाऱ्यांविरुद्ध कठोर कायदेशीर कारवाई करण्याचे निर्देश दिले. विशेषतः किनारपट्टी भागात परदेशी नागरिकांचा वावर अधिक असल्याने सुरक्षेवर अधिक भर देण्याची गरज त्यांनी व्यक्त केली.
➡️ गुप्त बातमीदारांचे जाळे मजबूत करण्यावर भर
फक्त कारवाई करून समस्या सुटणार नाही, तर गुप्त बातमीदारांचे जाळे भक्कम करून ठोस माहिती मिळवणे अत्यावश्यक असल्याचे सुकटे यांनी नमूद केले. यामुळे अंमली पदार्थांच्या साखळीचा उलगडा करण्यास मदत होणार आहे.
➡️ शाळा–महाविद्यालयांभोवतीही कडक पाळत
अंमली पदार्थांचा विळखा शैक्षणिक संस्थांपर्यंत पोहोचू नये यासाठी शाळा व महाविद्यालय परिसरातही कडक नजर ठेवण्याचे आदेश देण्यात आले आहेत. संबंधित विभागांनी यासाठी विशेष मोहीम राबवावी, असे निर्देश देण्यात आले.
➡️ ‘अंमली पदार्थ मुक्त सिंधुदुर्ग’ मोहिमेला गती
या मोहिमेत केवळ पोलीस नव्हे तर सर्व शासकीय विभागांनी सक्रिय सहभाग घेऊन जनजागृती वाढवण्याचे आवाहन करण्यात आले. तरुण पिढीला व्यसनापासून दूर ठेवण्यासाठी समाजानेही पुढाकार घ्यावा, असे आवाहन करत दोषींवर कोणतीही दया न दाखवता कठोर कारवाई करण्याचा इशारा प्रशासनाने दिला आहे.