सिंधुदुर्गात सरासरी ६० टक्के मतदान…
सिंधुदुर्गनगरी
जिल्हा परिषद आणि पंचायत समितीच्या सार्वत्रिक निवडणुकीसाठी आज झालेली मतदान प्रक्रिया अत्यंत उत्साहात पार पडली. संपूर्ण जिल्ह्याचे लक्ष लागून राहिलेल्या या निवडणुकीत मतदारांनी उत्स्फूर्त प्रतिसाद दिला असून जिल्ह्याची सरासरी मतदानाची टक्केवारी ६०.११ टक्क्यांवर पोहोचली आहे. सकाळपासूनच मतदान केंद्रांवर मतदारांच्या रांगा पाहायला मिळाल्या, ज्यामध्ये तरुण, महिला आणि ज्येष्ठ नागरिकांचा मोठा सहभाग होता.
जिल्ह्यातील तालुकानिहाय मतदानाची आकडेवारी पाहता, वेंगुर्ले तालुक्यात सर्वाधिक ६९.०३ टक्के मतदान झाले असून जिल्ह्याच्या टक्केवारीत हा तालुका अव्वल ठरला आहे. त्याखालोखाल सावंतवाडी तालुक्यात ६७.४५ टक्के इतके दणदणीत मतदान झाले आहे. राजकीय दृष्ट्या संवेदनशील मानल्या जाणाऱ्या कणकवली (५९.८४ टक्के) आणि दोडामार्ग (५९.८३ टक्के) या दोन्ही तालुक्यांमध्ये जवळपास सारख्याच प्रमाणात मतदान झाले असून मतदारांनी आपला कौल यंत्रणेत बंदिस्त केला आहे.
इतर तालुक्यांमध्येही मतदानाचा ओघ चांगला राहिला. मालवण तालुक्यात ५८.९० टक्के, तर देवगड तालुक्यात ५७ टक्के मतदानाची नोंद झाली. वैभववाडी तालुक्यात ५४.७९ टक्के आणि कुडाळ तालुक्यात ५४ टक्के मतदान झाले आहे. दरम्यान, किरकोळ तांत्रिक बिघाड वगळता संपूर्ण जिल्ह्यात मतदान प्रक्रिया शांततेत पार पडली असून, आता सर्वांच्या नजरा निकालाकडे लागल्या आहेत.
