डॉ. कीर्ती लड्ढा यांचे सखोल मार्गदर्शन; २२ प्रशिक्षणार्थींना प्रमाणपत्रांचे वितरण

कुडाळ :

कुडाळ येथील श्री. पुष्पसेन सावंत कॉलेज ऑफ फार्मसीमध्ये डॉ. बाबासाहेब आंबेडकर तंत्र विद्यापीठ तसेच एपीटीआय-एमएचएस यांच्या संयुक्त विद्यमाने ‘हर्बल एक्स्ट्रॅक्शन’ या विषयावर दोन दिवसीय कार्यशाळा यशस्वीपणे पार पडली. मुंबई येथील नामांकित आयसीटी संस्थेचे संशोधक व तज्ज्ञ प्राध्यापक डॉ. कीर्ती लड्ढा यांनी मुख्य मार्गदर्शक म्हणून उपस्थित राहून प्रशिक्षणार्थींना सविस्तर मार्गदर्शन केले.

या कार्यशाळेत नैसर्गिकरीत्या उपलब्ध असलेल्या विविध कच्च्या वनौषधी पदार्थांमधून औषधी घटक वेगळे करण्याच्या आधुनिक व सुलभ पद्धती डॉ. लड्ढा यांनी समजावून सांगितल्या. औषधी घटकांचे रासायनिक पृथक्करण, त्यासाठी लागणारी रसायने, उपकरणे व मशिनरीचा योग्य वापर प्रत्यक्ष प्रयोगांच्या माध्यमातून दाखवण्यात आला. प्रशिक्षणार्थींना सहज समजेल अशा प्रयोग पद्धतींवर विशेष भर देण्यात आल्याचे डॉ. लड्ढा यांनी सांगितले. प्रशिक्षणार्थी तसेच महाविद्यालयातील कर्मचाऱ्यांनी उत्साहाने सहभाग घेतल्यामुळेच ही कार्यशाळा यशस्वी ठरल्याचेही त्यांनी नमूद केले.

संस्थेचे अध्यक्ष भूपतसेन सावंत व परिसर संचालिका सौ. नूतन परब यांच्या पुढाकारातून या उपक्रमाचे आयोजन करण्यात आले होते. कार्यशाळेच्या सांगता समारंभात डॉ. कीर्ती लड्ढा आणि प्राचार्य डॉ. युवराज पांढरे यांच्या हस्ते २२ प्रशिक्षणार्थींना सहभागाची प्रमाणपत्रे वितरित करण्यात आली.

कार्यक्रमाचे प्रास्ताविक, सूत्रसंचालन व आभार सहाय्यक प्राध्यापक महादेव परब यांनी मानले. कार्यशाळेच्या यशस्वीतेसाठी समन्वयक सहाय्यक प्राध्यापक महादेव परब व प्रतीक तेर्से यांनी विशेष परिश्रम घेतले. यावेळी महाविद्यालयाचे प्राचार्य डॉ. युवराज पांढरे यांच्यासह अन्य मान्यवर उपस्थित होते.