युवा रक्तदाता संघटनेच्या प्रयत्नामुळे रुग्णांना लांबच्या प्रवासाची गरज संपेल

सावंतवाडी:

सिंधुदुर्ग जिल्ह्यातील रुग्णांसाठी सावंतवाडी उपजिल्हा रुग्णालयात अखिल भारतीय आयुर्वेद संस्थान, गोवा यांच्या बाह्यरुग्ण तपासणी केंद्राची (ओपीडी) सुरूवात करण्याची मागणी युवा रक्तदाता संघटनेने केली आहे.

माजी मंत्री, आमदार दीपक केसरकर यांना संघटनेच्या अध्यक्ष आणि रुग्ण कल्याण समिती सदस्य देव्या सूर्याजी यांनी निवेदन देऊन ही मागणी सादर केली. त्यांनी सांगितले की, सावंतवाडी आणि आसपासच्या परिसरातील रुग्णांसाठी ही सेवा उपलब्ध झाली, तर त्यांना मोठा दिलासा मिळेल.

सध्या रुग्ण उपचारासाठी पेडणे, धारगळ (गोवा) येथे जाऊन आयुर्वेद उपचार घेत आहेत. परंतु लांबच्या प्रवासामुळे अनेकांना गैरसोय होते. याची दखल घेऊन संघटनेने जिल्हा प्रशासनाकडे आणि आमदार केसरकर यांच्याकडे पाठपुरावा केला आहे.

देव्या सूर्याजी म्हणाले, “सावंतवाडीतच आयुर्वेद ओपीडी सुरू झाल्यास रुग्णांना प्रवासाचा त्रास कमी होईल, वेळ व पैसा दोन्ही वाचेल.” त्यांनी आरोग्य विभागाला या मागणीवर सकारात्मक विचार करून लवकरात लवकर कार्यवाही करण्याची अपेक्षा व्यक्त केली.

मागणीसाठी अर्ज देताना संघटनेच्या सदस्यांमध्ये मेहर पडते, अनिकेत पाटणकर, ॲड. प्रथमेश प्रभू, सुरज मठकर, वैभव सावंत, संदीप निवळे, देवेश पडते, अर्चित पोकळे यांच्यासह इतर सदस्य उपस्थित होते.

ही ओपीडी सुरू झाल्यास सिंधुदुर्गातील रुग्णांना गोव्याला प्रवास करण्याची गरज राहणार नाही आणि स्थानिक स्तरावर आयुर्वेद उपचारांचा लाभ घेता येईल.