*शेतीशाळेतुन शेतकऱ्यांना भात पिकावरील कीड व रोग या बद्दल मार्गदर्शन*

कुडाळ

शेतकऱ्याचे उत्त्पन्न वाढावे या साठी कृषी विभागाच्या माध्यमातून भात पिकावरील कीड व रोग सर्वेक्षण व सल्ला प्रकल्पा अंतर्गत नानेली या गावामध्ये शेतीशाळेमधुन भात पिकावरील किड व रोग या बद्दल कृषी सेवक ओम राऊत यांनी शेतकऱ्यांना मार्गदर्शन केले. या वर्गामध्ये कृषी सेवक ओम राऊत यांनी शेतकऱ्यांना संबोधत सध्या सुरु असलेला खरीफ हंगाम हा सर्वात महत्वाचा आहे व भात पिकाची लागवड झाली असून, सद्यस्थितीत पावसाची उघडझाप व ढगाळ वातावरणामुळे पाणथळ जमिनीत भातपिकावर निळे भुंगेरे,पाने गुंडाळणारी अळी,खोडकीडा,सुरळतील अळी,तुडतुडे,लष्करी अळी,गादमाशी या भात पिकाच्या प्रमुख किडी आढळून येतात. यामधूनच सद्यस्तितीत प्रामुख्याने निळे भुंगेरेंचा तुरळक प्रमाणात प्रादुर्भाव दिसून येत आहे. यासोबतच रोंगाचा सुद्धा प्रादुर्भाव दिसून येत असून, यामध्ये प्रामुख्याने पानावरील करपा, कडा करपा,व शेंडे करपा यांचा प्रादुर्भाव दिसुन येत आहे.
यामुळेच कृषी सेवक ओम राऊत यांनी शेतकऱ्यांना शेतीशाळेमधून किड व रोग नियंत्रणाबाबत सल्ला व फवारणी करण्याबद्दल मार्गदर्शन केले. तसेच शेती शाळेमध्ये कृषी सेवक ओम राऊत यांनी शेतकऱ्यांना थेट शेता मध्ये नेत कामगंध सापळा,पक्षी थांबे यांचे प्रात्यक्षिक सुद्धा करण्यात आले. अशाप्रकारे शेतकऱ्यांना शेताच्या बांधावर जाऊन प्रत्यक्ष मार्गदर्शन केले व शेतकऱ्यांना किड व रोग प्रत्यक्ष कसे असतात, त्यांची जीवनशैली कशी राहते,त्या भात पिकाला हानिकारक कशाप्रकारे ठरतात,त्याचं व्यवस्थापन कशाप्रकारे केले पाहिजे या बद्दल शेतीशाळेचे आयोजन केले. यासोबतच त्यांचा जैविक पद्धतीने तसेच रासायनिक पद्धतीने बंदोबस्त कसा करावा याबद्दल कृषी सेवक ओम राऊत यांनी शेतकऱ्यांना मार्गदर्शन केले. शेतीशाळा वर्गातुन शेतकऱ्यांना एकात्मिक किड रोग व्यवस्थापनाबाबत मार्गदर्शन केलं जात आहे.आणि प्रत्यक्ष शेतामध्ये गेल्यावर असे दिसून आले की,
तुरळक ठिकाणी निळे भुंगेरेंचा व करपा यांचा प्रादुर्भाव दिसुन आला आहे. या किडीच्या नियंत्रणासाठी ५० टक्के कारटॅप हायड्रोक्लोराईड २० ग्रॅम किंवा ट्रायझोफाॅस ४०% प्रवाही २० मिली किंवा ७५% अॅसिफेट २० ग्रॅम किंवा लॅम्डा सायहॅलोथ्रीन ५% प्रवाही ६ मिली १० लीटर पाण्यात मिसळुन पावसाची उघडीप पाहुन फवारणी करावी,व तसेच करपा नियंत्रणासाठी मॅनकोझेब किंवा कार्बेन्डाझिम १५ ग्रॅम, कॉपर ऑक्सिक्‍लोराईड २५ ग्रॅम १० लिटर पाण्यात मिसळून फवारणी करावी.अशाप्रकारे कृषी सेवक ओम राऊत यांनी शेतकऱ्यांना भात पिकावर फवारणी करण्याबद्दल शेतकऱ्यांना मार्गदर्शन केले.