*जागतिक साहित्य कला व्यक्तित्व विकास मंच तथा साहित्य प्रेरणा कट्टा आजगाव संस्थेच्या सन्मा. सदस्या लेखिका कवयित्री सौ. स्नेहा नारिंगणेकर लिखित अप्रतिम अष्टाक्षरी काव्यरचना*

आल्या रिमझिम सरी

आल्या रिमझिम सरी

गंध मातीच्या वासात

थेंब थेंब करी नाच

धुंद मृदेच्या श्वासात….. 1

तेजाळल्या आकाशात

लालनिळी वीज दाटे

सळसळ नागमोडी

कडाडता भय वाटे…. 2

रंग करडा सावळा

काळ्या ढगांनी लेवूनी

आभाळाला झाकोळत

आला सरींना घेऊनी…. 3

झाला अंधार गहन

वारा ढग घुसळतो

खोटी झुगारुनी भीती

सागरात उसळतो…. 4

लाट झिम्माड पाण्याची

भाव दाटूनी येतात

बाधा भीतीच्या विषाची

खुणा वाहुनी नेतात…. 5

आज व्याकुळ किनारा

चिंब ओला भिजणार

काही नि:शब्द वेदना

शब्द नवा विणणार…. 6

सौ.स्नेहा धोंडू नारिंगणेकर

शिरोडा सिंधुदुर्ग