*जागतिक साहित्य कला व्यक्तित्व विकास मंचचे सन्मा.सदस्य कवीवर्य वैद्यराज भूपाल त्र्यंबक देशमुख लिखित अप्रतिम काव्यरचना*
*🌷🍀 वृक्षाचे मनोगत 🍀🌷*
ह्या वनभूमीतून रोपटे झाड होत उगवले ।
पडले? वा फेकले बीज? कुणी हेतूने रोपले? ॥१॥
फिरता फिरता आज मला ते नजरेला पडले ।
थांबुन मी ही हितगुज केले , ते ही आनंदले ॥२॥
मीच पाहिला त्याच्या देही पशुपक्षांचा मेळा ।
त्यासमयी तो मला भासला विठूच लेकुरवाळा ॥३॥
सांगत होते ते मज सारी वार्ता कित्येक वर्षांची ।
सांगत असता अंतःकरणी कालव सुखदुःखाची ॥४॥
अवखळ वारा मीच अडवुनी दिला गारवा सकला ।
दिली तृप्तता हृदया छाया देऊन पांथस्थाला ॥५॥
फळेच दिधली त्यांना ज्यांनी दगडांनी ठेचले ।
दोर लावुनी घाव घालुनी कर माझे खेचले ॥६॥
वैद्यांना पंचांगे पुरवुन रुग्ण सर्व जगविले ।
कुसुमे सकला देऊन मी ही प्रतिमा—शव पूजिले ॥७॥
माझ्या आस्तित्वाने उत्सव—यज्ञ—सदन इथले ।
” मी हिरवा तर तू ही हिरवा ” तेच मला बोलले ॥८॥
पूर्ण भारती वर्षामध्ये धूम सुवर्णी होता ।
कारण माझे बांधव सारे क्षुपवेलीही होत्या ॥९॥
परंतु आता आज काळ हा कठिण अती पातला ।
नरदेहातुन अंश पशूचा सांग कुणी घातला ? ॥१०॥
विज्ञानाची कास धरुनी भ्रमिष्ट मानव झाला ।
इतुका की तो आज आमुची संगतही विसरला ! ॥११॥
संबंधांना तोडु नका हो एक सांगणे निर्वाणी ।
विसरलात तर अंतच तुमचा भाषा माझी गीर्वाणी ॥१२॥
🌺🌳🌸🌴🌹🌱🌷🌿💐☘🍁🎋
© रचयिता—कविवर्य
वैद्यराज भूपाल त्र्यंबक देशमुख
पिंपळनेर ( धुळे ) ४२४३०६
मो. ९८२३२१९५५०
८८८८२५२२११
🙏🙏🙏🙏🙏🙏🙏🙏🙏🙏🙏
*ह्या देशातील प्रत्येक राज्यातील व केंद्रातील सरकारांना विनंती की कृपया वृक्षतोड थांबवून नवीन वृक्ष लागवडीवरही भर द्यावा . तसेच प्रत्येक कक्षेत ( इयत्तेत वा क्लासमध्ये ) ” वृक्ष महती ” शिकवली जावी , अशी योजना असावी व प्रत्येक नागरिक वृक्षसंवर्धनाशी बांधला जावा .* 🙏🙏
