मुंबई (गुरुदत्त वाकदेकर) :
अखेर, मुंबईकरांची प्रतीक्षा संपली आहे, कारण पाच वर्षांनंतर लोअर परळ पूल आता अंशतः जनतेसाठी खुला करण्यात आला आहे. आज १ जूनपासून लोअर परळ येथील पुलाचा डावा भाग वाहतुकीसाठी खुला करण्यात आला आहे. मात्र, जुलै महिन्याच्या मध्यापर्यंत पुलाचे संपूर्ण काम पूर्ण होणे अपेक्षित आहे.
पुलाचा पश्चिम भाग जीके मार्गाला एनएम जोशी मार्गाशी जोडेल. पूल तोडल्यामुळे स्थानिक रहिवाशांच्या प्रवासाच्या वेळेवर आणि लोअर परळला नियमितपणे ये-जा करणाऱ्या हजारो कार्यालयीन लोकांच्या प्रवासाच्या वेळेवर लक्षणीय परिणाम झाला.
विशेष म्हणजे डिलाईल पूल असुरक्षित असल्याचे समोर आल्यानंतर सुमारे पाच वर्षांपासून तो वाहतुकीसाठी बंद करण्यात आला होता. यापूर्वी, महानगरपालिकेने ३१ मे पर्यंत पूल पुन्हा सुरू करण्याचे लक्ष्य ठेवले होते.
वरळीचे आमदार आदित्य ठाकरे, यांच्या मतदारसंघात हा पूल आहे. जुलै २०१८ मध्ये अंधेरीतील गोखले पूल कोसळल्यानंतर आयआयटी मुंबई यांनी संरचनात्मक तपासणी केल्यानंतर उड्डाणपूल बंद करण्याचा निर्णय घेण्यात आला. मध्य आणि पश्चिम रेल्वेला जोडणारा महत्त्वाचा दुवा असलेल्या या पुलावर गंज झाल्याचे तपासणीत उघड झाले आणि लोअर परळ, वरळी, करी रोड, लालबाग आणि प्रभादेवी या रहदारीच्या मार्गावरील वाहतूक पूर्णपणे बंद झाली होती.
