*गुजरातने लखनौचा सात धावांनी केला पराभव*

मुंबई (गुरुदत्त वाकदेकर) :

आयपीएल २०२३ च्या शनिवार (२२ एप्रिल) च्या पहिल्या सामन्यात गुजरात टायटन्सने लखनौ सुपर जायंट्सचा सात धावांनी पराभव केला. यासह गुजरातने स्पर्धेतील चौथा विजय मिळवला आणि विजयी मार्गावर परतले. आता गुणतालिकेत चार संघांचे आठ गुण आहेत आणि प्लेऑफची लढत रंजक होत आहे. या सामन्यात गुजरातने प्रथम फलंदाजी करताना १३५ धावा केल्या. प्रत्युत्तरात लखनौचा संघ केवळ १२८ धावा करू शकला आणि सामना सात धावांनी गमावला.

गुजरातकडून कर्णधार हार्दिक पंड्याने सर्वाधिक ६६ धावा केल्या. त्याचवेळी वृद्धिमान साहाने ४७ धावांची खेळी केली. लखनौकडून क्रुणाल आणि स्टॉइनिसने प्रत्येकी दोन गडी बाद केले. याला प्रत्युत्तर म्हणून लखनौकडून कर्णधार राहुलने सर्वाधिक ६८ धावा केल्या. मात्र, त्यांच्याशिवाय केवळ काईल मेयर्स (२८ धावा) आणि कृणाल पांड्या (२३ धावा) यांना दुहेरी आकडा गाठता आला. गुजरातच्या मोहित शर्मा आणि नूर अहमद यांनी प्रत्येकी दोन गडी बाद केले.

लखनौच्या अवघड खेळपट्टीवर गुजरातचा कर्णधार हार्दिक पंड्याने नाणेफेक जिंकून प्रथम फलंदाजी करण्याचा निर्णय घेतला. शुभमन गिल या सामन्यात खाते न उघडता कृणाल पांड्याचा बळी ठरला. यानंतर कर्णधार हार्दिकने वृद्धिमान साहासोबत ६८ धावांची भागीदारी केली. ३७ चेंडूत ४७ धावा करून साहा क्रुणालचा दुसरा बळी ठरला, पण हार्दिक खेळपट्टीवरच राहिला. लखनौच्या गोलंदाजांनी शानदार गोलंदाजी करत गुजरातच्या फलंदाजांना हात उघडण्याची संधी दिली नाही. याच कारणामुळे हार्दिकनेही संथ गतीने धावा काढल्या. दुसऱ्या टोकाला वेगवान धावा करण्याच्या प्रयत्नात गुजरातच्या फलंदाजांनी विकेट्स गमावल्या. अभिनव मनोहर तीन, विजय शंकर १० आणि डेव्हिड मिलर सहा धावा करून बाद झाले.अखेरच्या षटकात ५० चेंडूत ६६ धावा करून हार्दिक बाद झाला. रवी बिश्नोईने बाद होण्यापूर्वी एका षटकात दोन षटकार आणि एक चौकार लगावला. त्याच्या या शानदार खेळीमुळे गुजरातचा संघ सहा गडी गमावून १३५ धावा करू शकला. लखनौसाठी रवी बिश्नोई वगळता सर्व गोलंदाजांनी चांगली कामगिरी केली. बिश्नोईला एकही विकेट मिळाली नाही आणि त्याने चार षटकात ४९ धावा दिल्या. क्रुणाल आणि स्टॉइनिसने प्रत्येकी दोन गडी बाद केले. त्याचवेळी नवीन-उल-हक आणि अमित मिश्राला प्रत्येकी एक विकेट मिळाली.

१३६ धावांच्या सोप्या लक्ष्याचा पाठलाग करताना लखनौ संघाची सुरुवात चांगली झाली. कर्णधार राहुलने पहिल्या षटकात एकही धाव घेतली नाही, मात्र त्यानंतर त्याने हात उघडले. पॉवरप्लेमध्ये लखनौ संघाने एकही विकेट न गमावता ५३ धावा केल्या होत्या आणि विजयाच्या दिशेने वाटचाल केली होती. सातव्या षटकात राशिद खानने काइल मेयर्सला २४ धावांवर बाद केले. मात्र तिसऱ्या क्रमांकावर आलेल्या कृणाल पांड्याने राहुलसोबत ५१ धावांची भागीदारी करत संघाला विजयाच्या अगदी जवळ नेले. क्रुणाल २३ चेंडूत २३ धावा करून बाद झाला. यावेळी लखनौची धावसंख्या १०६ धावा होती. क्रुणाल बाद झाल्यानंतर विकेट्सची झुंबड उडाली. निकोलस पूरन सात चेंडूत एक धाव काढून बाद झाल्याने लखनौचा संघ अडचणीत आला. शेवटच्या षटकात षटकार मारण्याच्या प्रयत्नात कर्णधार राहुलही बाद झाला. त्याने ६१ चेंडूत ६८ धावा केल्या. यानंतर त्याच षटकात आणखी तीन विकेट पडल्या. लखनौचा संघ शेवटच्या षटकात १२ धावा करू शकला नाही आणि चार विकेट गमावल्या. यासह गुजरातने हा सामना सात धावांनी जिंकला. गुजरातकडून मोहित शर्मा आणि नूर अहमद यांनी प्रत्येकी दोन गडी बाद केले. राशिद खानने एक विकेट घेतली. लखनौचे दोन फलंदाज धावबाद झाले.

१३६ धावांच्या लक्ष्याचा पाठलाग करताना लखनौ संघाने १४ षटकात १ गडी गमावून १०५ धावा केल्या. या संघाला विजयासाठी शेवटच्या ३६ चेंडूत ३१ धावांची गरज होती. राहुल अर्धशतक झळकावत खेळत होता आणि कृणालही चांगल्या टचमध्ये दिसत होता. दोघांमध्ये अर्धशतकी भागीदारी झाली. अशा स्थितीत लखनौचा विजय निश्चित वाटत होता, मात्र पुढच्याच षटकात क्रुणाल बाद झाला आणि सामना रंगला. शेवटच्या सहा षटकांत लखनौचा संघ केवळ २३ धावा करू शकला आणि सहा विकेट्स गमावल्या. यामुळे संघाने सामना गमावला.