वेंगुर्ला
तरुण वर्ग हा देशाचा आधारस्तंभ आहे. तरुणांनी विचार करत बसू नये तर विचार करुन आचरण करावे. कोणतीही गोष्ट नाकारु नका, नाराज होऊ नका, त्याला धैर्याने समोरे जा. आदर्श मिळणे कठीण असले तरी समाजात आजही आदर्श आहे. बॅ.बाळासाहेब खर्डेकर यांचा आदर्श तरुणांनी घ्यावा असे आवाहन मालवण येथील स.का.पाटील महाविद्यालयाचे माजी प्राचार्य मेजर डॉ.श्रीपाद गिरसागर यांनी विद्यार्थ्यांना केले.
बॅ.खर्डेकर महाविद्यालयात २६ डिसेंबर रोजी स्व.बॅ.बाळासाहेब खर्डेकर यांचा ५९वा स्मृतिदिन साजरा करण्यात आला. यावेळी डॉ.गिरसागर बोलत होते. या देशाचे वैभव स्त्रियांनी आणि मुलींनी टिकवले आहे. मुली सहनशील असतात असे सांगून गुरुवर निष्ठा ठेऊन जीवन यशस्वी करा. बॅ.खर्डेकर हे उत्कृष्ठ खेळाडू होते. त्यांच्या निस्वार्थ समाजसेवा, निर्भयता, सौंदर्यदृष्टी या गुणांचा अंगिकार विद्यार्थ्यांनी करावा असेही डॉ.गिरसागर यांनी आवाहन केले. यावेळी व्यासपिठावर कार्यक्रमाचे अध्यक्ष प्राचार्य डॉ.विलास देऊलकर, बॅ.खर्डेकर स्मृतिदिन समितीचे चेअमरन प्रा.सदाशिव भेंडवडे, कलावलयचे अध्यक्ष सुरेंद्र खांबकर, बी.के.सी.असोसिएशनचे सतिश डुबळे, राज्यशास्त्र विभाग प्रमुख डॉ.आनंद बांदेकर, कनिष्ठ महाविद्यालयाचे पर्यवेक्षक प्रा.दिलीप शितोळे उपस्थित होते.
मान्यवरांच्या हस्ते बॅ.बाळासाहेब खर्डेकर यांच्या प्रतिमेचे पूजन करण्यात आले. बॅ. खर्डेकर हे दातृत्ववान होते. त्यांनी आपल्याला मिळालेली चषक, चांदीची पदके विकून गरीब व होतकरु विद्यार्थ्यांना मदत केली. तसेच ते स्त्रियांचाही सन्मान करत असल्याची माहिती प्राचार्य देऊलकर यांनी दिली.
बॅ.खर्डेकर स्मृतिदिनाचे औचित्य साधून इंग्लिश वक्तृत्व स्पर्धा घेण्यात आली होती. या स्पर्धेत वीस विद्यार्थ्यांनी सहभाग घेतला. यात प्रथम क्रमांक पटकाविलेल्या लक्ष्मी प्रभूखानोलकर हिला फिरती ढाल, प्रमाणपत्र व पारितोषिक देऊन तर स्पर्धेतील द्वितीय क्रमांक प्राप्त सानिका मांजरेकर, तृतीय यशोदा परब व सानिया वराडकर, उत्तेजनार्थ फाल्गुनी नार्वेकर यांना पाहुण्यांच्या हस्ते प्रमाणपत्र व पारितोषिक देऊन गौरविण्यात आले.
मुंबई विद्यापिठामार्फत गुणवंत शिक्षकेत्तर कर्मचारी पुरस्कार प्राप्त (ग्रामीण विभाग) संजय पाटील यांचा प्रमुख पाहुण्यांचा हस्ते शाल, श्रीफळ, स्मृतिचिन्ह देऊन, कोकणरत्न पुरस्कार विजेते प्रा.दिलिप शितोळे, प्रा.वसंत नंदगिरीकर, प्रा.अरविंद बिराजदार यांचा तसेच माजी प्राचार्य श्रीपाद गिरसागर यांचाही शाल व श्रीफळ देऊन सन्मान करण्यात आला. ग्रामपंचायत सदस्यपदी कनिष्ठ महाविद्यालयाचे शिक्षक हेमंत गावडे यांची निवड झाल्याबद्दल त्यांचाही गौरव केला. कनिष्ठ महाविद्यालयाचे सेवाज्येष्ठ शिक्षक बी.बी.जाधव आणि सेवा ज्येष्ठ कर्मचारी बोलेकर यांचाही सन्मान करण्यात आला.
कै.प्रा.उदयराव देसाई यांच्या स्मरणार्थ श्रीमती माधुरी देसाई व प्रणव देसाई यांच्याकडून महाविद्यालयास पाच हजार रुपयांची देणगी देण्यात आली. यावेळी माजी उपनगराध्यक्ष शितल आंगचेकर, अॅड.गिरसागर, प्रि.एम.आर.देसाई इंग्लिश मिडियमच्या मुख्याध्यापिका मिताली होडावडेकर, अरविद आळवे, वामन धुरी, चंद्रशेखर माडकर, महादेव करंगळे, अशोक सावळे, सुरेंद्र चव्हाण आदी उपस्थित होते.
कार्यक्रमाचे प्रास्ताविक प्रा.भेंडवडे, पाहुण्यांचा परिचय प्रा.डॉ.एम.बी.चौगले, सूत्रसंचालन संपदा दिक्षित तर आभार प्रा.डॉ.आनंद बांदेकर यांनी मानले.
