*जागतीक साहित्य कला व्यक्तित्व विकास मंच सदस्या ज्येष्ठ लेखिका कवयित्री सौ ज्योत्स्ना तानवडे लिखीत अप्रतिम काव्यरचना*
वृत्त — वनहरिणी
*” समर्पण”*
स्वर मुरलीचे कानी येता कुंजवनी मी धाव घेतली
नाचत नाचत तालावरती गोप गोपिका रास खेळती ||
कुणा न उरले भान कुणाचे स्वर गुंजन ते धुंद करितसे
तोडुन सारे भावबंध हे तुझ्याकडे मी धाव घेतसे ||
तुझी माधवा ओढ अनावर धावत आले जगा विसरुनी
तुला पाहुनी चैतन्याचा निर्झर झरतो माझ्या मधुनी ||
माझे मी पण तुला समर्पित माझी मी तर उरले नाही
राधा मोहन अद्वैताचे रूप मनोहर जग हे पाही ||
तुटले सारे माया बंधन उन्मुक्त कशी झाली बाधा
कृष्णार्पण हे जीवन केले कृष्णरूप ती होई राधा ||
ज्योत्स्ना तानवडे. पुणे
