*जागतीक साहित्य कला व्यक्तित्व विकास मंच सदस्या ज्येष्ठ लेखिका कवयित्री सौ ज्योत्स्ना तानवडे लिखीत अप्रतिम अभंग रचना*

*🙏 सावळे सुख 🙏*

सावळ्या सुखाचा | ध्यास हा मनाचा |
लाभ दर्शनाचा | विठ्ठलाच्या ||१||

ओढ ही अंतरी | गाठली पंढरी |
माऊलीच दारी | दिसू लागे ||२||

पाहता माऊली | वाचा मूक झाली |
तार छेडियली | अंतरात ||३||

माऊलीचा लळा | तैसा बा सावळा |
अंतरीच्या कळा | जाणतसे ||४||

घडो तुझी भक्ती | सरावी आसक्ती |
जन्माची निवृत्ती | लाभो मज ||५||

तुझ्या भजनात | मन राहो नित्य |
सरावे हे द्वैत | पांडुरंगा ||६||

एकत्वाची जाण | सरो मी-तू पण |
अंतरीची खूण | द्यावी मज ||७

ज्योत्स्ना तानवडे. पुणे