*”जागतिक साहित्य कला व्यक्तित्व विकास मंच”…”आम्ही बालकवी” समूह सदस्या लेखिका कवयित्री आदिती मसुरकर यांची अप्रतिम बालगीत रचना*

*परी राणी*

*काव्यप्रकार -बालगीत*

स्वप्नात आली माझ्या एक परीराणी,

गात होती ती छान छान गाणी.. ॥ धृ ॥

हातात होती तिच्या जादूची छडी,

तिला पाहताच मी मारली दडी….

कानावर आली तिची गोड वाणी

गात होती ती छान छान गाणी ॥ १ ॥

मला म्हणाली तू घाबरू नकोस मुला,

जादूची नगरी मी दाखवीन तुला..

फिरवीन तुला मी हिरव्यारानी

गात होती ती छान छान गाणी ॥ २ ॥

जादूचे पंख तिने लावले मला

अद्भूत विश्व पाहू चला ..

रम्य जग पाहून डोळा आले पाणी

गात होती ती छान छान गाणी ॥ ३ ॥

ताऱ्यांच्या पंगतीत मी पोटभर जेवलो,

चांदोबाच्या गंमती ऐकुनी खूप हसलो..

बागडत होती तिथे चंदाराणी

गात होती ती छान छान गाणी ॥ ४ ॥

परीच्या घरी होती खेळणी खूप सारी,

त्यांच्यासंगे खेळण्या मजा आली भारी.

परीची बाहुली होती नाव तिचे बानी

गात होती ती छान छान गाणी ॥ ५ ॥

तेवढ्यात कानी आली आईची हाक ,

झोपेतून जाग येताच स्वप्न झाले खाक.

अशी होती परीची सुंदर कहाणी

गात होती ती छान छान गाणी ॥ ६ ॥

*✒️© सौ आदिती मसुरकर*

*कुडाळ, सिंधुदुर्ग*