*जागतिक साहित्य कला व्यक्तित्व विकास मंच सदस्या ज्येष्ठ लेखिका कवयित्री सौ.राधिका भांडारकर यांची रामनवमी निमित्त लिहिलेली अप्रतिम काव्यरचना*
*रामनवमी*
चैत्र शुद्ध नवमीस राम जन्मला।
आयोध्या नगरीत आनंद जाहला।
सातवा अवतार भगवान विष्णुचा।
प्रकाशली धरा अंधार निमाला ।।
कौसल्येचा राम आत्म्याचा प्रकाश।
एकपत्नी एकवचनी एकबाणी ।
हिंदु संस्कृतीचा सच्चा आधारस्तंभ।
रामराज्यात नव्हती भीतीची नावनिशाणी…।।
रामनवमीस सोहळा साजरा जन्मोत्सवाचा ।
नक्षत्र पुनर्वसु वेळ भर मध्यान्हीची ।
घरोघरी सजतो पाळणा रामजन्माचा ।
सजावट चंपा केवडा सायलीची।।
सुवासिनी मधुर स्वरे पाळणा गाती ।
सुंठवड्याचा महाप्रसाद जनी वाटती।
काकुस्थ करुणानिधी मर्यादा पुरुषोत्तम।
आदर्श रामाचा प्रेमभावे पुकार करती।।
श्रीलंकेत वध केला दुष्टप्रवृत्ती रावणाचा ।
अशोकवनी बंदीस्त महापतीव्रता सीता ।
सुटका होउनी भेट जाहली रामसीतेची ।
वनवासीचीही संपली चवदा वर्षे आता..।।
राम लखन सीता सवे हनुमान परतले।
अयोध्यानगरी आनंदीली दुमदुममली ।
दिवस रामनवमीचा मंगलमय रामजन्माचा।।
प्रजाजनांच्या ह्रदयी हर्षभरी गुढी ऊभारली..।।
सौ. राधिका भांडारकर
पुणे
