*जागतिक साहित्य कला व्यक्तित्व विकास मंच सदस्य लेखिका कवयित्री श्रीम.उज्वला कोल्हे यांची काव्यरचना*

*पादाकुलक वृत्त..(८+८)*

*ऋतू..*

*चक्र ऋतूंचे अविरत फिरते*

*चित्र धरेचे बदलत असते*

*कोण कळेना करते जादू*

*लोभसवाणी धरणी सजते*

*वसंत देतो नवी पालवी*

*वृक्ष बहरती निसर्ग शोभा*

*कोकीळ कुहू सुमधुर गाणे*

*सृष्टी फुलते प्रसन्न आभा*

*ग्रीष्म ऋतूचा दाह उन्हाचा*

*आग ओकतो सांजसकाळी*

*गुलमोहरही लाल केशरी*

*सुखावते मन रानोमाळी*

*वर्षा करते धरेला नवी*

*हिरवा शालू परिधान करी*

*झाडे डुलती वा-यासंगे*

*गंधित माती जशी कस्तुरी*

*शरदामध्ये पडते थंडी*

*टपोर त्याचे असे चांदणे*

*चंद्र पाहता मग पुनवेचा*

*या डोळ्यांचे फिटे पारणे*

*हेमंताचा ऋतू गोजिरा*

*शीत गारवा देत शिरशिरी*

*भूवर पसरे शाल धुक्याची*

*हुडहुडी भरे हवा बोचरी*

*रूप आगळे या शिशिराचे*

*पिवळी पाने गळुनी जाती*

*नवीन फुटते पुन्हा पालवी*

*सुखदुःखाची शिकवण देती*

*सहा ऋतूंचे सहा सोहळे*

*अनुभव आहे जरा वेगळे*

*सृष्टीचा हा खेळ अनोखा*

*प्रत्येकाचे तत्व निराळे*

*…………✍*

*👉उज्ज्वला कोल्हे,uk*

*कोपरगाव*