मालवण
गोळवण येथील जयश्री बाळकृष्ण खरात (वय-२७) या विवाहितेचा मृतदेह राहत्या घरी गळफास लावलेल्या स्थितीत दिसून आला. याबाबत येथील पोलीस ठाण्यात आकस्मिक मृत्यू म्हणून नोंद करण्यात आली आहे.
पोलिसांनी दिलेल्या माहितीनुसार जयश्री यांचा विवाह पाच वर्षांपूर्वी बाळकृष्ण खरात यांच्याशी झाला. ते दोघेच घरात राहत होते. आज बाळकृष्ण हे मालवण येथे कामास आले होते. दुपारी घरी परतल्यावर पत्नीचा कोणताही प्रतिसाद मिळाला नाही. घरात पाहिले असता गळफास लावलेल्या स्थितीत जयश्री यांचा मृतदेह दिसून आला. पोलिस निरीक्षक एस. एस. ओटवणेकर, सहाय्यक पोलीस निरीक्षक सचिन चव्हाण, रुक्मांगद मुंडे आदी पोलीस पथक घटनास्थळी दाखल झाले. जयश्री यांनी आत्महत्या केल्याचे बोलले जात होते. अधिक तपास पोलीस निरीक्षक श्री. ओटवणेकर यांच्या मार्गदर्शनाखाली पोलीस करत आहेत.
