*जागतिक साहित्य कला व्यक्तित्व विकास मंचचे सन्मा सदस्य ज्येष्ठ कवी लेखक संजय धनगव्हाळ लिखित अप्रतिम काव्यरचना*

*कितीदा पाहिलं तुला*

कितीदा पाहिलं तुला

रात्रभर जागलेलं,

पण कधीच पाहिलं नाही

असं निवांत झोपलेलं.

आयुष्यभर तुझ्या नशिबी

राब, राब, राबणंच असतं;

उंबरठ्याच्या बाहेर कधी

जगणं तुझं नसतं.

घडीभर थांबून तू कधी

सुखाचा घास घेत नाहीस;

चार घास दुसऱ्यांना देताना

तुझ्या वाट्याला काहीच येत नाही.

वेदना पदराला बांधून

तू फक्त हसतच राहायचं,

दुसऱ्यांच्या सुखामध्ये

स्वतःचं सुख पाहायचं.

घरपण देता देता

तू तुलाच विसरून जातेस;

तुझ्याच जखमांवर तू

कितीदा पांघरूण घालतेस.

तुला असं गाढ झोपलेलं पाहून

मनात हुंदका दाटून येई;

डोळे भरून बघताना

कळेना, कुठली गाऊ अंगाई.

तुझे त्याग, समर्पण, कष्ट

पाहून घेतो जरा वेळ;

तुझ्याच सोबत खेळेन मी

प्रत्येक जन्मी भातुकलीचा खेळ.

*संजय धनगव्हाळ*

*(अर्थात कुसुमाई)*

९५७९११३५४७

९४२२८९२६१८