*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री सुशीला हेमचंद्र पिंपरीकर लिखित अप्रतिम काव्यरचना*

*धर्मवीर संभाजी राजे*

शिवराय छावा, शंभूराजे

छत्रपती द्वितीय स्वराज्याचा

मातृविरह सईबाईच्या पुत्रास

पुत्र मग जाहला जिजाऊचा |१|

वय अवघे नऊ वर्षांचे

तहात तारण औरंगजेबाचे

शिवपुत्र शौर्यवंत बाळराजे

दुर्लक्ष पित्याचे, व्याप स्वराज्याचे |२|

क्षात्रतेज मुखावर शंभूच्या

युध्दनीती निपुण, निर्भयता

संस्कृत ग्रंथ बुधभूषण संपन्न

राज्य प्रशासकीय मौलिकता |३|

राखले स्वराज्य नऊ वर्षे

हतबल औरंगजेब हैराण

अटकसत्र जबर राबविताना

हत्यार फितुरीचे घेई सैतान |४|

असीम धैर्याचा राजा सिंह

फाडला जयाने जबडा वाघाचा

थकला युध्दात तो औरंग्या

गिळण्या तत्पर घास धर्मांतराचा |५|

स्वकीय अवसान घातकी क्रूर

खुपसला खंजीर पाठीमागून

बेसावध नदीतिरी संगमेश्वरात

खान मुफर्रब यशस्वी दे पकडून |६|

अवयव एकेक रक्तबंबाळ

छ्ळले, *करी तू धर्मांतर*

साखळदंड फरफटणारा भूवरी

परी थेंब थेंब दे हिंदुत्व ललकार |७|

सीमा क्रौर्याची झाली पार

तरी हृदयी, जागता हिंदुत्व अंगार

लाथाडले *इस्लाम कबूल* भ्याडाला

अंत्यक्षणी परिधान धर्मवीर शृंगार |८|

सुशीला हेमचंद्र पिंपरीकर, नाशिक