माणुसकीचा झरा! हवेलीनगर फोंडाघाट येथे गाईच्या वासराचे जीवदान

अजित नाडकर्णी यांच्या सतर्कतेमुळे वेलीत अडकलेल्या नवजात वासराची सुखरूप सुटका

हवेलीनगर (फोंडाघाट) :

माणुसकी आणि प्राण्यांप्रती असलेली संवेदनशीलता याचे हृदयस्पर्शी उदाहरण आज सकाळी हवेलीनगर येथे पाहायला मिळाले. सकाळी मॉर्निंग वॉकसाठी बाहेर पडलेल्या अजित नाडकर्णी यांच्या सतर्कतेमुळे एका गाईच्या नवजात वासराचे प्राण वाचले.
आज पहाटे सुमारे ६ वाजण्याच्या सुमारास चालताना नाडकर्णी यांचे लक्ष एका गाईकडे गेले. ती गाय सतत त्यांच्याकडे पाहत होती आणि जवळच्या झाडाकडे काहीतरी सूचित करत असल्याचा भास त्यांना झाला. संशय आल्याने त्यांनी थांबून पाहणी केली असता, त्या झाडाजवळील वेलीत गाईचे गोंडस नवजात वासरू अडकलेले दिसले.
क्षणाचाही विलंब न लावता त्यांनी त्या ठिकाणी धाव घेत वासराची सुटका केली आणि सुरक्षितपणे आईजवळ आणून ठेवले. आई–वासराच्या त्या भेटीचा भावनिक क्षण पाहून उपस्थितांचे डोळे पाणावले.
रात्रीच जन्मलेले वासरू आईच्या ओटीला जाऊन दूध पिताना पाहून नाडकर्णी यांनी समाधान व्यक्त केले. “माणसांना नाही, पण प्राण्यांना अशी बुद्धिमत्ता कुठून येते,” असा भावनिक प्रश्नही त्यांनी व्यक्त केला. या घटनेमुळे “आजच्या दिवशी माझ्याकडून चांगले कार्य घडले,” असा अभिमानही त्यांनी व्यक्त केला.
या घटनेमुळे परिसरात अजित नाडकर्णी यांच्या माणुसकीचे कौतुक होत असून, प्राणीमात्रांप्रती दयाभाव जपण्याचा संदेश पुन्हा एकदा अधोरेखित झाला आहे.