*ज्येष्ठ लेखिका कवयित्री प्रज्ञा घोडके लिखित अप्रतिम काव्यरचना*

*अशी होळी करू साजरी…!*

रंग उधळूया मनात, द्वेष,मत्सर जाळू आधी

मनामनात पेटवू प्रेमाची उजळून ज्वाळी;

जात-धर्माची राख उडो वार्‍यावर सारी,

आपुलकीचा सुगंध पसरू दे

अशी होळी करू साजरी…

निंदा-तिरस्काराची काडीकाडी जाळूया,

संवेदनांची ऊब अंगणात उगवूया;

हात हातात घेऊन चालूया सारी,

सामंजस्याच्या रंगात

अशी होळी करू साजरी…

निसर्गाचे रंग जपू, पाणी वाचवूया

शब्दांचे फटके नको शांततेचे व्रत घेऊ;

स्वच्छ विचारांची उधळण करू घरोघरी,

हरित होळीच्या संकल्पात

अशी होळी करू साजरी…

अनाथ,उपेक्षित,थकलेल्या जीवांसाठी,

आशेचा गुलाल लावू कपाळी;

दया-दातृत्वाचा रंग व्हावा साजरी,

मानवतेच्या स्पर्शाने

अशी होळी करू साजरी…

खोटेपणाची राख जाळू अंतरंगात

सत्याचा रंग खुलवू प्रत्येक रंगात;

मौनातील अर्थही बोलू दे भारी,

प्रामाणिकतेच्या प्रकाशात

अशी होळी करू साजरी…

उद्याच्या हातात आजची जबाबदारी

समतेची मशाल धरू दृढ निश्चयी;

एकात्मतेच्या रंगांनी न्हाऊ दे

वस्त्या-गल्ल्या सारी,

नव्या भारताच्या स्वप्नात

अशी होळी करू साजरी…

सौ.प्रज्ञा घोडके,चिंचवड,पुणे©®