कणकवली :
मुंबई–गोवा महामार्गावर ओसरगाव येथे रविवारी सायंकाळी सुमारे ५.३० वाजण्याच्या सुमारास कार आणि एसटी बसचा भीषण अपघात झाला. गोव्याहून पुण्याच्या दिशेने जाणाऱ्या कारचे नियंत्रण सुटल्याने ती डिव्हायडर ओलांडून दुसऱ्या लेनमध्ये आली आणि समोरून येणाऱ्या एसटी बसला धडकली.
मिळालेल्या माहितीनुसार, पुणे-पासिंग असलेली कार गोव्याहून पुण्याच्या दिशेने भरधाव जात होती. ओसरगाव येथे आल्यावर चालकाचे कारवरील नियंत्रण सुटले. वेगात असलेली कार डिव्हायडरवर चढून विरुद्ध दिशेच्या लेनमध्ये घुसली. त्याचवेळी समोरून एसटी बस येत होती. अचानक समोर आलेल्या कारला वाचवण्यासाठी बस चालकाने प्रसंगावधान राखत बस तातडीने बाजूला घेऊन डिव्हायडरवर चढवली. बस चालकाच्या या धाडसी निर्णयामुळे मोठी जीवितहानी टळली, मात्र बसच्या डाव्या बाजूचे मोठे नुकसान झाले आहे.
या अपघातात कारचा समोरील व मागील भाग पूर्णपणे चक्काचूर झाला आहे. कारमधील दोघांना गंभीर दुखापत झाली असून त्यांना तातडीने अधिक उपचारांसाठी जिल्हा रुग्णालयात दाखल करण्यात आले आहे. एसटी बसमधील प्रवासी सुदैवाने बचावले.
अपघाताची माहिती मिळताच स्थानिक नागरिक आणि पोलिसांनी घटनास्थळी धाव घेऊन मदतकार्य केले. अपघातामुळे काही काळ वाहतुकीस अडथळा निर्माण झाला होता.
