सिंधुदुर्ग :

सन २००२ मध्ये उपअधीक्षक म्हणून महाराष्ट्र पोलीस दलात प्रवेश केलेले पोलीस अधीक्षक डॉ. मोहन दहिकर यांनी शिस्तबद्ध, पारदर्शक व प्रभावी कार्यपद्धतीने पोलीस दलात आपली वेगळी ओळख निर्माण केली आहे. त्यांच्या उल्लेखनीय व दीर्घ सेवेसाठी भारत सरकारकडून राष्ट्रपती पदक (Medal for Meritorious Service) जाहीर करण्यात आले असून, या सन्मानामुळे सिंधुदुर्ग जिल्ह्यासह संपूर्ण राज्यात आनंद व अभिमानाची भावना व्यक्त होत आहे.

सेवेच्या सुरुवातीला वरोरा व नागपूर (ग्रामीण) उपविभागात उपविभागीय पोलीस अधिकारी म्हणून काम करताना त्यांनी प्रभावी पोलिसिंगचा ठसा उमटवला. पुढे अतिरिक्त पोलीस अधीक्षक पदावर जालना येथील पोलीस प्रशिक्षण केंद्राचे प्राचार्य म्हणून कार्यरत असताना त्यांच्या समर्पित नेतृत्वामुळे व सर्वांगीण प्रशासनामुळे त्या केंद्राला ‘आयएसओ प्रमाणपत्र’ प्राप्त झाले—ही त्यांच्या कार्यक्षमतेची ठोस पावती ठरली.

मुंबई पोलीस आयुक्तालयात पोलीस उपायुक्त (वाहतूक), झोन १० व झोन ११ येथे कार्यरत असताना गुन्हे अन्वेषण, अंडरवर्ल्डमधील फरारी आरोपींचे प्रत्यर्पण, कायदा व सुव्यवस्था तसेच व्हीआयपी दौऱ्यांचे नियोजन यांसारख्या जबाबदारीच्या कामकाजात त्यांनी उल्लेखनीय यश संपादन केले. मुंबई एटीएसमध्ये पोलीस उपायुक्त म्हणून असताना अनेक दहशतवादी गटांचा पर्दाफाश करून त्यांनी राष्ट्रीय सुरक्षेला भक्कम आधार दिला.

जातीयदृष्ट्या संवेदनशील भिवंडी शहरात पोलीस उपायुक्त म्हणून कार्यरत असताना सूक्ष्म नियोजन व अचूक अंमलबजावणीच्या माध्यमातून धार्मिक सण तसेच २०२४ ची विधानसभा निवडणूक शांततेत पार पाडत त्यांनी आपली नेतृत्वक्षमता पुन्हा अधोरेखित केली.

लोकांसाठी सहज उपलब्धता, ठाम नेतृत्व आणि सरळ, कायदेशीर जाण ही त्यांची ओळख आहे. त्यांच्या सेवाभावी वाटचालीची दखल घेत २०१९ मध्ये त्यांना पोलीस महासंचालकांचे सन्मानचिन्हही प्रदान करण्यात आले होते. आता राष्ट्रपती पदक जाहीर झाल्याने त्यांच्या कर्तृत्वावर अधिकृत शिक्कामोर्तब झाले असून, सिंधुदुर्ग जिल्ह्यासाठी हा अभिमानास्पद क्षण ठरला आहे.

सेवाप्रती त्यांच्या प्रशंसनीय समर्पणाबद्दल सर्व स्तरांतून डॉ. मोहन दहिकर यांचे अभिनंदन होत आहे.